کرهکتنه: مرسل امیري
د نیمې شپې کتابتون د برېتانوي لیکوال مېت هېګ کتاب دی چې په ۲۰۲۰ میلادي کال کې خپور شوی. دا کتاب د یوې ښځې کیسه کوي، چې په خپل ژوند کې له ناامیدۍ او غم سره مخ ده او د دې کیسې د پېچلتیاوو له لارې د ټاکلو یا انتخاب، فرصتونو او ځان ته د ژوند مانا پیدا کولو په اړه خبرې کوي.
دا کتاب یو ځانګړی مفهوم لري، چې کتابتون کې په نیمه شپه کې پېښیږي او د انسان روح د ژوندي پاتې کېدو او د خپلو ستونزو سره د مخامخ کېدو د نوې لارې د لټون پر لور رالېږي.
مېت هېګ (Matt Haig)
یو برېتانیایي لیکوال او ژورنالیست دی. هغه په ۱۹۷۵ کال کې د برېتانیا په لیدز ښار کې زېږېدلی دی. مېت هېګ خپل د هغو کتابونو لپاره مشهور دی، چې د ژور ارواح پوهنیز او فلسفي موضوعات یې په کې بیان کړي دي
مېت هېګ د خپلې لیکوالۍ پر وخت د رواني روغتیا له ستونزو سره مخ شو، چې د خپګان او اضطراب له امله یې سختې تجربې لرلې. هغه په دې اړه د (Reasons to Stay Alive) په نوم خپل یو کتاب کې، چې د رواني روغتیا، افسردګۍ او ژوند ته د خوشبختۍ بېرته د راګرځولو په اړه دی او د خپګان سره یې د خپل مبارزې تجربه او درسونه د نورو خلکو سره شریک کړي.
مېت هېګ د خپلو کتابونو له لارې د رواني روغتیا د مسایلو او د هغو کسانو لپاره چې له اضطراب او افسردګۍ سره مبارزه کوي، ځینې ژورې او الهام بخښونکي خبرې وړاندې کړي دي.
مېت هېګ خپلې لیکوالۍ سبک او مېتود ته ځانګړی پام کوي. هغه د ژوند په اړه فلسفي مفاهیم د یو ساده، خو په زړه پورې ډول سره وړاندې کوي. د هغه کتابونه معمولاً د رواني ستونزو، ځان پېژندنې، او د خوښۍ لټولو په اړه دي. د نیمې شپې کتابتون په څېر کتابونه یې د لوستونکو سره د دې لپاره خبرې کوي چې څنګه د ژوند کړاوونه او ستونزې د بدلون او پرمختګ لپاره یو فرصت ګرځېدلی شي.
مېت هېګ د نیمې شپې کتابتون له لارې لوستونکو ته یو ځانګړی پیغام وړاندې کوي. دا کتاب د یوې ښځې کیسه کوي چې د خپل ژوند د ټاکلو او راتلونکې په اړه وېره لري دی. کتاب د هغې په ژوند کې د بېلا بېلو ټاکلو او د هغو څخه د زده کړو په اړه تمرکز کوي، د هغې د ژوند لپاره نوې مانا راوباسي.
نیمې شپې کتابتون د هېګ یوه له خورا بریالیو کتابونو څخه دی، چې د نړۍ په کچه یې د لوستونکو د پام وړ ګرځېدلی دی. د دې کتاب د موضوعاتو پراخه پوهه، د افسردګۍ او رواني ستونزو سره د مبارزې لاره او د ژوند د مانا په اړه دی.
د مېت هیګ نور اړین کتابونه
مېت هېګ د خپلو کتابونو له لارې خلکو سره مرسته کوي، ترڅو د ژوند کړاوونو او ستړیاو سره مخامخ شي، خپل ځان وپېژني او خوشبختۍ لاره ومومي.
۱ ـ (Reasons to Stay Alive) په دې کتاب کې هېګ د خپل ژوند د افسردګۍ او اضطراب سره د مبارزې تجربې او درسونه شریکوي.
۲ـ (How to Stop Time) دا کتاب د یو سړي په اړه دی، چې له ګڼو پېړیو څخه ژوند کوي او د وخت په تېرېدو سره د نړۍ د بدلون شاهد دی.
۳ ـ (The Humans) دا کتاب د انسانانو یو عجیب او فلسفي انځور وړاندې کوي
د نیمې شپې کتابتون (The Midnight Library) کتاب لنډیز
د نیمې شپې کتابتون کیسه د نورا په نوم یوې ښځې پر ژوند څرخېږي. نورا په خپل ژوند کې د ناکامیو، غمونو او اضطراب سره مخ ده. هغه د خپل تېرو ټاکنو څخه پښیمانه ده او د ځان وژنې په اړه فکر کوي؛ په دې حالت کې هغه یو داسې ځانګړی عجیب او جادويي ځای چې نوم یې د نیمې شپې کتابتون دی، لار مومي، چې هر کتاب یې د هغې د ژوند یوه بله بېلګه ده. دغه کتابونه هغې ته بېلابېل ټاکنې او ممکنه ژوندونو لارې ښیي. هر کتاب د هغې په ژوند کې یوه نوې لاره وړاندې کوي، چې شاید له هغې سره د خوشحالۍ، بریالیتوب او د ځان پېژندنې لامل وي.
په دې توګه، نورا په دې کتابتون کې له بېلابېلو ژوندونو سره مخ کېږي او ځان پېژني. د دې سفر په ترڅ کې، نورا پوهېږي چې هره ټاکنه او هره لاره په خپل ځای کې یوازې د خوشبختۍ نه، بلکې د دردو او ستونزو په برخه کې هم خپلې ګټې لري.
هغې ته د کتابتون مدیره مرستې لپاره راځي او هغې ته ښيي چې په ژوند کې هېڅوک د بشپړ ټاکنې سره نه مخ کېږي. خوښۍ او مانا موندل داخلي سولې او خپل ځان پېژندنې له لارې شونې ده.
دا یو فلسفي سفر دی، چې هغې ته دا ښیي چې ژوند تل د ټاکنو او نوو فرصتونو پر بنسټ جوړ شوی دی او د هر ټاکنې د خوشحالۍ یا درد د تجربې شاته یو ښکلی عبرت پټ دی.
په پای کې نورا پر دې پوهېږي چې ژوند تل د تېرې پښېمانۍ نه بلکې د راتلونکې فرصتونو پورې تړلی دی، خپل ژوند ته نوې مانا ورکوي او د خوشبختۍ په لور روانه کېږي.
د نیمې شپې کتابتون یو الهام بخښونکې کیسه ده، چې د ټاکنو، د فرصتونو دویمه هڅه او د ژوند مانا په اړه فلسفي تفکر کوي.
د نیمې شپې کتابتون د کتاب شخصیتونه او اړیکې
د نیمې شپې کتابتون کتاب د بېلابېلو شخصیتونو له لارې د ژوند د ټاکنو، پښیمانۍ او د معنوي پرمختګ په اړه خبرې کوي. دلته به موږ د دې کتاب مهم شخصیتونو در وپېژنو:
۱ ـ نورا (Nora Seed): نورا د دې کتاب اصلي او مرکزي شخصیت ده. هغه یوه ۳۵ کلنه ښځه ده، چې په خپل ژوند کې له بېلابېلو ستونزو سره مخ ده، لکه د پښېمانۍ، افسردګۍ او انزوا. نورا په پیل کې خپل ژوند بې مانا احساسوي او ځان وژنې په اړه فکر کوي. خو کله چې هغه د نیمې شپې کتابتون ته لاره پیدا کوي، د هغې ژوند د بېلابېلو ټاکنو او احتمالي بدیلونو له لارې بدلېږي.
نورا په دې سفر کې ځان پېژندنې او ژوند د مانا لټولو یوه نوې لاره مومي. د هغه کتاب د ټاکنو د فلسفې پر بنسټ د ژوند نوي مفهومونه ترلاسه کوي. نورا د دې کتاب له لارې پوهېږي چې خوشبختي یوازې د یو ځانګړي ژوند سره تړلې نه ده، بلکې د ټاکنو، پوهې او درک له لارې رامنځته کېږي.
۲ ـ الم : الم د کتاب د کتابتون د مدیرې شخصیت دی. هغه د نورا لپاره یوه لارښوده او مرستندویه شخصیت دی، چې د نورا سره د هغې په سفر کې مرسته کوي. الم هغه ته د بېلابېلو کتابونو په لټه کې وړاندیزونه کوي، چې هر یو د نورا د ژوند یوه بېلګه ښیي. الم نورا ته دا ور زده کوي چې د ژوند بېلابېلې ټاکنې هر یو یې د خپل د ګټې او زیان برخې لري چې دا د نورا په پوهه او درک کې مرسته کوي. الم د نورا د ذهنیت بدلولو لپاره یوه لارښوده شخصیت دی. هغه نورا ته د خپل ژوند د مانا موندلو او هیلې موندلو په اړه درسونه ورکوي.
۳ ـ ډیوید (David) : ډیوید د نورا یوه پخوانۍ اړیکه ده، چې په دې کتاب کې د هغې له یادونو سره یوځای کېږي. هغه د نورا د ځوانۍ د ژوند یوه مهمه برخه وه. په دې کیسه کې، نورا ډیوید د خپل ژوند د یو مهم ټاکنې په توګه یادوي، او د هغې ژوند د ډیوید سره بېل شوی دی. د ډیوید سره د اړیکې بېلګه نورا ته دا ښیي چې د هغه سره د اړیکې پرېکول د هغې یو لوی ټاکنه وه او هغه د خپل ژوند له دې پرېکړې پښېمانه ده. کتابتون کې د ډیوید په کتاب کې، د ورا درک لپاره یوه مهمه بېلګه وړاندې کوي چې هغه ته د ژوند د بېلابېلو تجربو او پښېمانۍ په اړه هغه یو نوی درکته رسېږي.
۴ ـ آلیس (Alice): آلیس د نورا یوه نږدې ملګرې ده چې د هغې د ژوند یوه مهمه برخه ده. د هغې د پخوانۍ اړیکې او تجربو یو نښه ده. د نورا سره د آلیس اړیکه له هغې سره مرسته کوي چې د ژوند په اړه ځینې غورونې او پښېمانۍ و ارزوي. آلیس هم د کتاب د فلسفې پر بنسټ د نورا د پرېکړو او ټاکنو سره یوه اړیکه لري او د دې اړیکو له لارې نورا خپل ژوند ته نوې مانا ورکوي.
فلسفي او رواني اړخونه
د نیمې شپې کتابتون کتاب د فلسفي او رواني اړخونو په اړه ژور بحث کوي. د دې کتاب فلسفي او رواني اړخونه د انسان د ټاکنو، فرصتونو، ځان پېژندنې او خوشبختۍ په لټه کې د ژوند پېچلتیاوې روښانه کوي. په دې کتاب کې د نورا د شخصیت د رواني وضعیت، ژوند ټاکنو او د دې انتخابونو پر بسټ د هغې د احساساتو څپړنه د پام وړ دی. دلته د دې کتاب مهم فلسفي او رواني اړخونه باندې بحث کوو.
۱ ـ ټاکنه یا انتخاب: د دې کتاب یو له اړینو فلسفي او رواني اړخونو څخه ټاکنه یا انتخاب دی. هېګ د دې کتاب له لارې د انسان په ژوند کې د ټاکنو او غوره کولو ځواک ښیي. دا چې څرنګه کوچني یا لوی انتخابونه د یو انسان ژوند بدلولی شي او هغه ته د بېلابېلو لارو په وړاندې سره د خوشحالۍ لار پرانیزي.
۲ ـ فرصتونه (Second Chances) : د دې کتاب دویم ستره مفکوره فرصت دی. نورا د خپلو تېرو انتخابونو او غلطیو په اړه پښېمانه ده، خو د کتابتون له لارې هغې ته داسې فرصت ورکول کېږي چې له دې تېرو انتخابونو څخه نوی ژوند جوړ کړي. دا د انسان لپاره یو اړین پیغام دی، چې هېڅکله د یوه بدې ټاکنې له امله ژوند پای ته نه رسېږي او تل د ژوند د بیا جوړولو فرصت شته.
۳ ـ خوشبختي: د دې کتاب له بل مهمو موضوعاتو څخه دی. نورا په لومړیو کې یوازې د ژوند د تېرولو لپاره ژوند کوي او په خپل ژوند کې له غمونو او نا هیلۍ سره مخ ده. د دې کتابتون له لارې پوهېږي چې خوشبختي یوازې د کامیابۍ او مادي ارزښتونو کې نه ده. خوشبختي په ځان پېژندنې، د ټاکلو ازادي او په ژوند کې د نوو لارو موندلو کې ده.
۴ ـ افسردګي او رواني ستونزې: د کتاب یو بل رواني اړخ له افسردګۍ، اضطراب او رواني فشارونو سره د مبارزې پر بنسټ ولاړ دی. نورا د کتاب په پیل کې د خپګان او غم احساس کوي او ځان وژنې هڅه کوي. د دې رواني ستونزو سره مبارزې لپاره د کتابتون جادویي نړۍ د هغې لپاره یوه دروازه پرانیزي، چې له هغې سره مرسته وکړي ترڅو خپل ژوند ته نوې مانا ورکړي. په دې توګه کتاب د افسردګۍ او رواني فشارونو سره د مبارزې لارې ښیي او د دې په اړه خبرې کوي چې څنګه کولای شو د ژوند له کړاوونو څخه د وتلو لپارخ نوي لارې پیدا کړو. د دې کتاب یوه ژوره فلسفه دا ده، چې د ژوند پر وړاندې د مثبت فکر او خوښۍ د پیدا کولو لپاره باید خپل ذهنیت بدل کړو او خپل ټاکنې وپېژنو.
۵ ـ د ژوند مانا پیدا کول: په ټوله کې د نیمې شپې کتابتون د ژوند په اړه یو فلسفي سوال کوي: د ژوند اصلي مانا څه ده؟ نورا په پیل کې فکر کوي چې د خپل ژوند د ټاکنو له امله هېڅ ارزښت نه لري. خو وروسته د کتابتون په سفر کې هغې ته څرګندېږي چې ژوند د یوه ځانګړي موخې او مانا سره تړلې ده. دغه مانا د انسان د احساساتو، انتخابونو او خپل د ژوند د شرایطو د ارزونې له لارې څرګندېږي.
دا مفکوره د لوستونکو لپاره دا پیغام وړاندې کوي چې خوشبختي او مانا په داسې شرایطو کې نه موندل کېږي چې یوازې د ظاهري بریا او خوشحالۍ پر بنسټ وي، بلکې د داخلي سولې، د ځان پوهې او د خپلو انتخابونو د درک له لارې ترلاسه کېږي.
کتاب سبک او مېتود
مېت هېګ د ساده، خو ژورې لیکنې سبک کاروي، چې د لوستونکو لپاره د شخصیتونو او مفاهیمو پېژندل اسان وي. هغه د پېچلو مفاهیمو لکه انتخاب، پښېمانۍ او د ژوند مانا په یو اسانه او په زړه پورې ډول وړاندې کوي. هېګ خپل پیغام د داسې ژبې په کارولو کې وړاندې کوي چې د لوستونکو ټولو کچو لپاره مناسب وي، ځکه چې نه یوازې د فلسفي ډلو لپاره بلکې د ټولو هغه کسانو لپاره دی چې د ژوند مانا لټوي، دغه کتاب په اسانۍ سره درک کولی شي.
د نورا د افکارو او احساساتو د بیانولو لپاره، هېګ له داخلي خبرو اترو او رواني وضعیتونو څخه کار اخلي، چې د دې له لارې د هغې احساسات او د ژوند سره د هغې تعاملات په ګوته کوي. هېګ د کیسې روایت د لومړۍ شخص له زاویه کوي، چې دا کار لوستونکو سره د نورا په شخصیت کې داخلېدو او د هغې سره د دې پېچلو احساساتو د شریکولو امکان برابروي. دا مېتود لوستونکو سره یو ژور تړاو جوړوي او هغوی ته د نورا د ژوند د بدلولو په لاره کې مرسته کوي.
د کتاب یو بل مهم خصوصیت دا دی چې هغه د ژورو فلسفي پوښتنو او مفاهیمو پر بنسټ لیکل شوی دی. هېګ نیمې شپې کتابتون کې د ژوند د انتخابونو، مانا،او موخو په اړه د ژور فکر کولو فرصت ورکوي. هغه د نورا په مرسته لوستونکو سره دا مفاهیم شریکوي.
د نیمې شپې کتابتون کتاب مېتود داسې دی چې د رېښتینې نړۍ سره د یو جادويي او فلسفي لارو یو ځای کولو پر بنسټ ولاړ دی.
داخلي خبرې او دروني جګړه هېګ د نورا د شخصیت د احساساتو او افکارو بیانولو لپاره د داخلي خبرو اترو یوه ځانګړې طریقه کاروي. نورا د خپلو غلطیو او پښېمانیو په اړه خبرې کوي او دا د هغې لپاره یو فرصت دی، چې د خپل رواني حالت او د ژوند د بېلابېلو لارو د ارزونې له لارې خپله داخلي جګړه حل کړي.
د کتاب منځنۍ برخه د جادويي کتابتون د فضا سره تړاو لري. دغه کتابتون د نورا لپاره یوه استعارتي ځای دی چې له هغه څخه د ژوند د بېلابېلو انتخابونو او بدیلونو د ممکنه پایلو په اړه پوهه ترلاسه کوي. دغه جادويي کتابتون د نورا د خپلو تجربو او د ژوند د پېښو لاندې کولو یوه بېلګه ده، چې د فلسفي پیغام په رڼا کې تشریح کېږي.
هېګ د کتابتون جادويي فضا واقعي ژوند سره تداخل کوي. د نورا د شخصیتونو او بدیلونو د انتخابونو له لارې هېګ د نړۍ د بېلابېلو شونو سناریوګانو سره مخ کوي. دا طریقه لوستونکو سره مرسته کوي چې د شخصیت رواني تحول او د هغې د ژوند د بدلونونه ښه درک کړي.
هېګ هڅه کوي چې فلسفي او رواني موضوعاتو پېچلتیاوې په یوه ساده او د لوستلو لپاره په مناسب ډول وړاندې کړي. د هغه ژبه د ټولو لوستونکو لپاره په اسانۍ سره درک وړ ده، خو له دې سره سره ژور او قوي پیغامونه هم وړاندې کوي.
پایله
د نیمې شپې کتابتون کتاب د خپل ساده، خو فلسفي سبک او د ژورو مفاهیمو د وړاندې کولو لپاره ځانګړی دی. هېګ د جادويي کتابتون یوه فضا جوړوي چې د ژوند د ټاکنو، خوشبختۍ او معنوي پرمختګ په اړه ژورې خبرې کوي. یو الهام بخښونکی اثر دی، چې د انتخابونو، فرصتونو او د ژوند مانا په اړه د ژور تفکر کولو فرصت ورکوي. مېت هېګ د دې کتاب په مرسته لوستونکو ته داسې یوه نړۍ وړاندې کوي چې هره لحظه کې د بدلون، زده کړې او ځان پېژندنې نوې لارې ومومي. دا کتاب نه یوازې د یوه شخص په اړه دی، بلکې د ټولو خلکو لپاره یو پیغام لري چې په خپل ژوند کې له ستونزو سره مخ کېږي.
ماخذونه
۱ ـ هېګ، میت. (۲۰۲۰ م). کتابخانه نیمه شب، ترجمه، محمد صالح نورانی زاده.
2_ Pulley, Natasha (27 August 2020). “The Midnight Library by Matt Haig review – a celebration of life’s possibilities”. The Guardian (به انگلیسی). Retrieved 12 May 2021.
۳ ـ ویکپېډیاوې
