د فراه د کلیو بیارغونې او پراختیا ریاست د یاد ولایت په «بالابلوک» ولسوالۍ کې د اوبو رسونې یوې شبکې د جوړېدو خبر ورکړی دی.
د سرچینې د معلوماتو له مخې چې د دې شبکې په جوړېدو ۶٫۹ میلیون افغانۍ مصرف شوې، او ۶۰۰ کورنیو د څښاک پاکو اوبو ته لاسرسی موندلی دی.
د فراه د کلیو بیارغونې او پراختیا ریاست د مسوولینو په وینا چې د اوبو رسونې دا شبکه د ملګرو ملتونو د ماشومانو ملاتړ ادارې (یونیسف) په مالي ملاتړ د بالابلوک ولسوالۍ په «کنسک» کلي جوړه شوې ده.
بلخوا د یادې سیمې اوسېدونکو د دې شبکې پر جوړېدو خوښي ښودلې او له سرپرست حکومت څخه یې غوښتي چې د دغه ولایت په لرې پرتو سیمو کې هم ورته شبکې جوړې کړي.
له تېرو دریو کلونو راهیسې د هېواد په بېلابېلو ولایتونو کې د اوبو رسونې لسګونه شبکې جوړې او ګټېاخیستنې ته سپارل شوې دي.
