لیکوال: عبیدالله حسام
زموږ ځوانان باید د اسلامي امارت د تېرو شوو صالحو علماوو پر پل قدم کېږدي او له هغو دې زده کړي چې د ژوند په کومو اړخونو کې څومره پیاوړي وو؟
له هغو څخه لاندې ټکي د بېلګې په توګه یادوم:
۱ – د ایمان پیاوړتیا
۲ – په دین ویاړ
مسلمان ځوان باید پر خپل دین باندې وویاړي او د خپل دین د ویاړونو په اډانه کې پیاوړی وي. لکه څرنګه چې جعفر بن ابي طالب رضی اله عنه د حبشې له پاچا سره په خبرو کې په خپل دین ویاړ کړی و، لکه څرنګه چې ربعي بن عامر د وخت د لوی طاغوت (رستم فارسی) په مخکې درېدلی و او په ډېر جراات سره یې د الله پاک د دین ارزښت ورښودلی و.
عز بن عبدالسلام چې د مصر د پاچا (ایوب) په مخکې خپل سر نه ټیټوي او حق وینا ورته کوي.
همداسې په ننني عصر کې هم موږ ځینې ځوان پیاوړي علماء لرو چې د لویو قدرتونو پر وړاندې په ډېره څرګنده خپله خبره کوي او له الله تعالی پرته له بل چا وېره نه لري.
۳ – اخلاقي پیاوړتیا
مسلمان ځوان باید د خپل عزت، عفت او امانت په ساتلو کې غښتلی او رښتینی وي، د خپلو مسلمانانو وروڼو پر وړاندې ډېر نرم او د دین د دښمنانو په مقابل کې سخت وي.
له خپلو مسلمانانو ورونو سره باید مرسته کوونکی، رحم کوونکی او له تېروتنو تېرېدونکی وي.
۴ – علمي پياوړتیا
مسلمان ځوانان د ژوند په نورو برخو کې د پياوړتیا ترڅنګ د علم په ډګر کې هم باید تر نورو مخکښ، خلاق او نوښتګر وي.
۵ – دعوت او سیاسي برخه کې پیاوړتیا
د مسلمانانو اوسنیو بدمرغیو او فاسدو نظامونو ته په پام سره د ځوانانو مسوولیت دی څو د اسلام په خپرولو او پلي کولو کې کوټلی ګامونه واخلي. د ټولنې، ملت او هېواد ستونزې درک کړي او د حل لارې ورته ولټوي او په دې برخه کې خپله وجیبه ادا کړي.
۶ – جسمي پیاوړتیا
اسلام لکه څنګه چې په معنوي برخه کې د مسلمانانو پر پیاوړتیا ټینګار کوي، همدارنګه پر جسمي پیاوړتیا او روغتیا هم ټینګار کوي.
اسلام سست او ناتوانه انسان ته اړتیا نه لري او که مسلمان ځوان خپلې بدنې روزنې ته پاملرنه ونه کړي، خپل دین ته ګټه نه شي رسولی.
دې ته په کتو د ځوانانو وجیبه او مسوولیت دی چې د خپل دین خدمت وکړي، پرې وویاړي، ګټې په پام کې ونیسي، خپلې معنوي او جسمي پیاوړتیا ته په کلکه پام وکړي، په ځان کې کمروزي ټکي له منځه یوسي او له وخت څخه سالمه ګټه پورته کړي.
ځکه الله پاک له انسان څخه د ځوانۍ د پړاو پوښتنه کوي، چې ځواني یې څنګه او په څه ډول تېره کړه او د الله پاک حساب په رښتیا ډېر سخت دی.
