ژباړه: ګلثوم محمدي
کاهو د پاڼې لرونکي سبزيجاتو په ډله کې راځي، چې د بدن لپاره خورا گټور او له مغذي موادو څخه مال مالا دي. دغه سابه بېلابېل ډولونه لري او ټول يې د فايبر او انتي اکسیدان څخه ډکې دي. د کاهو له مهمو ځانگړتياوو څخه د وزن کمول، د کولمو روغتيا او د ويني شکر تنظيمول دي.
په دې ليکنه کې:
۱- د کاهو تغذيي ارزښت؛
۲- د هډوکو پياوړتيا؛
۳- کاهو د بدن اوبه تأمينوي؛
۴- د سترگو سلامتيا؛
۵- ښه خوب درلودل؛
۶- د امېندوارۍ پر مهال د کاهو گټې؛
۷- ځيگر کولمو او پښتورگو لپاره د کاهو گټې.
۱- د کاهو تغذيي ارزښت
د کاهو بېلابېل ډولونه يې شته او ښه خبر دا دی، چې ټول يې بدن لپاره گڼې روغتيايي گټې لري. هر څومره چې د کاهو پاڼې شنه (سبز) رنگ وي، هغومره ستاسو روغتيا لپاره گټورې تمامېدای شي. کاهو په خپل ترکيب کې په زياته کچه فولاټ، کلروفيل، ويټامين C او کاروتنوئید لري، دغه دغه ترکيبات بدن لپاره خورا گټور تمامېږي.
۲- د هډوکو پياوړتيا
د کاهو له مهمو ځانگړتياوو څخه د بدن د هډوکو پياوړتيا دي. کاهو په خپل ترکيب کې په زياته کچه ويټامين K لري، چې د هډوکو د پياوړتيا لامل کېږي. په غذايي رژیم کې د کاهو اضافه کول او په منظم ډول يې کارول کولای شي، د هډوکو د ماتېدو مخه ونيسي. تاسو کولای شئ کاهو له ليمو، نارنج، زيتون، سیر او نورو معطرو سبزيجاتو سره ترکيب او ترې گټه واخلئ.
۳- کاهو د بدن اوبه تأمينوي
کاهو په خپل ترکيب کې په زياته کچه اوبه لري، د دې گټور سابه شاوخوا 95 سلنه يې اوبه تشکيلوی او د بدن د تازه والی لامل کېږي. د کاهو ترکيب له مستو سره د بدن د تازه ساتلو لپاره يو ښه خوندور او مناسب سلاد دي.
۴- د سترگو سلامتيا
ويټامين A په بدن کې مهم رول لوبوي او په زياته کچه په کاهو کې شتون لري، چې د سترگو له سلامتيا سره مرسته کوي. د دې ويټامين کارول د آب مرواريد( د سترگو يو ډول ناروغۍ) او دژنراسیون ماکولا (Macular degeneration) د ناروغيو د اخته کېدو خطر کموي.
۵- ښه خوب درلودل
که غواړئ ښه خوب او سالم غذايي رژیم ولرئ؛ نو په خپل غذايي رژیم کې د کاهو زياتول مه هېروئ. په کاهو کې د لاکتوسین او لاکتوکاریوم شتون د بدن د ارامتيا لامل کېږي. په دغه سبو کې د مگنيزيم او پوټاشیم شتون د عضلاتو او د عصبي سیستم د ښې فعاليت او ښې خوب لامل کېږي.
پر دې سربېره مطالعاتو ثابته کړې ده، چې د کاهو ترکيب له انگور او عسل سره د بدن انرژي تأمينوي.
۶- د امېندوارۍ پر مهال د کاهو گټې
د امېندوارۍ پر مهال سالمي غذايي رژیم درلودل، د جنين د ودې (تکامل) لامل کېږي. مېندو بايد په دې ستونزمن پړوا کې سالم غذايي رژیم ولري.
کاهو د مغذي مواد او فوليک اسيد په لرلو سره د مور او ماشوم ايمني سیستم پياوړي کوي.
۷- ځيگر کولمو او پښتورگو لپاره د کاهو گټې
کاهو په خپل ترکیب کې په زیاته کچه ويټامین C لري، چې د انتي اکسيدان يوه بېلگه ده چې له ځيگر څخه ساتنه کوي او په بدن کې د سم( زهر) په پاکول کې هم مرسته کوي.
کاهو په ترکيب کې په زياته کچه اوبه لري، چې د پښتورگو د ښې فعاليت لامل کېږي. همدارنگه په دې سابه کې د A, K او C ويټامينونو شتون پښتورگو لپاره گټور تمامېدای شي.
کاهو د لوړ فايبر په لرلو د وزن په کمولو کې هم مرسته کوي. فايبر د کولمو حرکات پياوړي کوي او د قبضیت مخنيوی کوي.
