د کابل ښاروالي وايي چې د کابل د اوومې ناحیې اړوند د لومړۍ ګذر په ګذرګاه سیمه کې د یو فرعي سړک او دوو کوڅو د جوړولو کارونه پیل شوي دي.
د کابل ښاروالۍ د برنامو او پروژو د تنظیم ریاست د مالوماتو له مخې چې دا چارې د ملګرو ملتونو د پروژوي خدمتونو د دفتر په مرسته پیل شوې دي.
د دې ادارې په خبرپاڼه کې ویل شوي چې دا پروژه په ټولیزه توګه (۶۸۰) متره اوږدوالی او له (۳) څخه تر(۵) مترو سور لري، او دلښتیو او (۱۱۰۰) متر مکعب استنادي دیوال جوړول هم شامل دي او چارې به یې د ۴میاشتو په موده کې په معیاري او اساسي ډول بشپړې شي.
د ویلو ده چې په دې پروژه کې لسګونه کسانو ته د کار زمینه هم برابره شوې ده.
کابل ښاروالۍ تر دې مخکې هم د کابل ښار په بېلابېلو سیمو کې د لسګونه فرعي سړکونو د جوړېدو خبر ورکړی و.
