ژباړه: محمدحامد بهیر
دا رښتینې کیسه د انگلیسي ځواکونو له خوا د ایران د اشغال په وخت کې پېښه شوې ده، چې نړیوالو رسنیو خوندي کړې وه.
کلونه مخکې چې ایران د انگلیسي ځواکونو له خوا نیول شوی و، انگلیسې جنرال (ساني موډ) چې د هیواد په یوه سیمه کې روان و، په لاره کې یې په یوه شپانه باندې سترگې ولگېدې او ودرید.
خپل ژباړن ته یې وویل: لاړشه او هغه شپانه ته ووایه چې جنرال ساني وایي چې که له خپل سپي څخه دې سر پرې کړ، یو انگلیسي پونډ درکوم!
شپانه چې کولای شول په یوه پونډ باندې د خپلې رمې نیمایي برخه واخلي!
په بیړه یې خپل سپی راونیو او سر یې ور څخه پرې کړ.
هغه وخت جنرال بیا شپانه ته وویل: که سپی دې پوست کړې، یو بل پونډ هم درکوم!
شپانه بل پونډ هم وخیست او سپی یې پوست کړ.
جنرال د درېیم ځل لپاره د خپل ژباړن په واسطه شپانه ته وویل چې، دا درېیم پونډ هم واخله او سپی دې ټوټې ټوټې کړه!
شپانه هم درېیم پونډ واخیست او سپی یې ټوټې ټوټې کړ.
کله چې انگلیسي جنرال روان شو، شپانه په هغې پسې ورمنډه کړه او ورته ویې ویل چې که څلورم پونډ هم راکړې، زه به دا سپی پوخ کړم.
جنرال ساني موډ وویل چې نه!
ما غوښتل چې د دې هیواد او سیمې د خلکو اداب او کړه وړه وگورم او خپلو سرتېرو ته یې وښییم!
چې تا یوازې د دریو پونډو لپاره خپل سپی چې د لارې ملگری دې وو او همدارنگه ستا او ستا د رمې ساتونکی وو، سر یې دې ور پرې کړې، پوست دې کړ، ټوټې ټوټې دې کړو او که څلورم پونډ درکړم، نو هغه پخوې هم!!
او معلومه نه ده چې که پنځم پونډ درکړم څه څه کارونه به ونه کړې.
هغه وخت جنرال ساني خپل مخ د خپلو ملگرو سرتېرو په لوري واړوه او ویې ویل: “تر څو چې دا ډول خلک په دې خاوره کې شتون ولري، تاسې د هیڅ ستونزې په کیسه کې مه کېږئ!”
