ژباړه: ګلثوم محمدي
د امېندوارۍ پر مهال سالمي غذايي رژیم درلودل، د جنين د ودې (تکامل) لامل کېږي. امېندواري يو حساس پړاو دی، مېندو بايد په دې ستونزمن پړوا سالم غذايي رژیم ولري. په ځانگړي توگه هغه کسان چې د وینې، ویټامینونو، کلیسم او داسې نورو له کموالي سره مخ وي، دوی بايد په دې اړه معلومات ترلاسه کړي، چې کومو مغذي موادو ته اړتيا لري.
د امېندوارۍ پر مهال باید کوم خواړه وخوړل شي؟
د حمل پر مهال داسې کوم ټاکل شوی غذايي رژیم نشته. په حقیقت کې د امېندوارۍ پر مهال سالم غذايي رژیم د ټولو لپاره يو شان دي. د مېوو، سبزيو، غلاجاتو، پروټين، غوښه، لبنياتو، اوبه او سالم غوړ ډېر کارول او همدارنگه په دې مهال کې تاسو بايد ځينې مهمو مغذي موادو ته پام وکړئ، چې خورا مهمې دي.
فولاټ او فوليک اسید
فولاټ د B گروپ له ويټامينونو څخه شمېرل کېږي، چې د عصبي سیستم نيمگرتياوې (ناهنجاري جدي مغز و نخاع) څخه مخنيوی کوي. د فولاټ مصنوعي بڼه په ټابلېټونو او پروسس شوی خواړو کې موندل کېږي، چې د فوليک اسيد په نوم يادېږي. د فوليک اسيد ټابلېټونه د وخت څخه مخکې زېږون خطر کموي. پانې لرونکي سابه، لوبیا او نخود د فولاټ له طبیعي سرچينو څخه بلل کېږي.
کلسيم، ويټامين D ،پروټين؛ د هډوکو پياوړتيا
تاسو او ستاسو جنين د پياوړې هډوکو او غاښونو کلسیم ته اړتيا لري. سربېره پر دې، کلسيم د وينې دوران منظموي او همدارنگه د عضلاتو او عصبي سیستم د ښې فعاليت لامل کېږي. لبني محصولاتو د کلسيم د جذب غوره سرچينې دي.
ويټامين D د جنين د هډوکو او غاښونو په جوړولو کې مرسته کوي. د غوړ کب د ويټامين D غوره سرچينې بلل کېږي.
د حمل پر مهال د جنين د ودې لپاره پروټين له مهمو موادو څخه بلل کېږي. غوښه، کب، هگۍ، نخود، لوبیا او سويا د پروټين له مهمو سرچينو څخه شمېرل کېږي.
اوسپنه؛ د وينې کموالی يا د اوسپنې کمښت
بدن د هموگلوبین (هغه پروټين چې په سرو حجرو کې موندل کېږي) د توليد په خاطر اوسپنې ته اړتيا لري ترڅو اکسیجن د نسجونو او عضلاتو ته ولېږدولو شي. د امېندوارو ښځو اړتيا اوسپنې ته دوه برابره دي ځکه دوی د جنين اکسیجن تامينوي. که په بدن کې د اوسپنې زېرمه لږ وي او د حمل په وخت په کافي کچه اوسپنه ترلاسه نه کړئ، ښايي د اوسپنې کمښت سره مخ شئ. د حمل په وخت کې د اوسپنې کمښت د دې لامل کېږي چې د ماشوم وزن کم شي. سره غوښه، د کب غوښه، لوبیا او سبزۍ د اوسپنې له غورو سرچينو څخه شمېرل کېږي.
اوبه
د امېندوارۍ پر مهال بايد دوه برابره اوبه وڅښل شي ځکه هم جنين او هم مور ته گټور تمامېدای شي. اوبه او هغه مغذي مواد چې تاسو يې کاروئ له قبضیت، بواسیر او له ځينو ميکروبو څخه مخنيوی کوي. ډاکټران سپارښتنه کوي چې د حمل پر مهال هره ورځ بايد 10 گيلاس اوبه وڅښل شي.
د حمل پر مهال غذايي رژیم؛ هغه خواړه چې تاسو بايد له خوړل یې ډډه وکړئ
د امېندوارۍ پر مهال سالمي غذايي رژيم يو له خورا مهمو شيانو څخه دي، چې د حمل پر مهال او هم له زېږون څخه وروسته بايد ورته پاملرنه وشي. سالم غذایي رژیم هم د مېرمنو پر روغتيا او د ماشوم پر روغتیا مستقیمه اغېزه کوي. اما ځينې خواړه دي، چې هم مېرمنو ته او هم جنين ته زيان رسوي. ايا پوهېږئ چې د حمل پر مهال د کومو غذايي موادو له خوړلو څخه ډډه وکړئ؟
د حمل په وخت کې هغه خواړه چې خام وي، يا هم په سمه توگه پخه شوې نه وي، د دې ډول غذاگانو خوړل په هېڅ ډول د توجيه وړ نه دي او بايد په جدي توگه ډډه وشي. ځکه چې ښايي بدن مسموم وشي او جنين ته زيان ورسېږي. ځینې نور موارد هم شته چې بايد په پام کې ولرئ لکه د نه مينځل شوی سبزيو او مېوو څخه ډډه وکړئ، د کافئين د زياتو کارولو څخه ډډه وکړئ، الکول مه کاروئ او د غير پاستوريزه شوی غذايي موادو
له خوړلو څخه ډډه وکړئ لکه پنير، مستي، شيدې او نور…
