کلسیم هغه معدني عنصر دی چې تر ډېره په هډوکو کې ځای لري او زموږ په بدن کې د نورو عناصرو په پرتله ډېر موندل کېږي. کله چې د کلسیم کچه په وينه کې راټیټه شي، د هيپوکلسمي په نامه يوه ناروغي منځته راځي، چې د پاراټيروئيد غدې ستونزې، د پښتورگو اختلالات، په غدايي رژیم کې ضعف او همداسې د ځينو درملو په وړاندې حساسيتونه هم رامنځته کېدای شي.
په دې ليکنه کې:
1- د کلسیم د کموالي مهمې نښې؛
2- نورې نښې؛
3- څه وخت باید ډاکټر ته مراجعه وکړو؟؛
4- د کلسیم د کمښت د مخنيوي لارې چارې.
1- د کلسیم د کموالې مهمې نښې
له بده مرغه د کلسیم کمښت په پيل کې هېڅ داسې کومې نښې نه لري، خو د وخت په تېريدو سره ځان څرگندوي. د کلسیم کموالې گڼ شمېر لاملونه لري، چې دلته یې ځينې مهمې لاملونه را اخلو:
۱- د عضلاتو درد
د عضلاتو درد هم د کلسیم د کموالې له مهمو نښو څخه گڼل کېږي، چې له بده مرغه ډېری خلک دا نښه جدي نه نيسي. د لاسونو درد، د پښو دردونه د حرکت په وخت کې دا هم د کلسيم د کمښت له مهمو لاملونه څخه شمېرل کېږي.
۲- ستړيا
بې خوبي، خواب الودگی او ډېره ستړيا هم د هيپوکلسمي نښې کېدای شي. هغه خلک چې د کلسیم کمښت لري، د عادي حالاتو په پرتله ډېر بېحاله وي، کسالت او د انرژي نشتوالي احساس کوي. سر گرځېدل (سرگيچي)، د سر درد دا هم د کلسیم د کمېدو نښې کېدای شي.
۳- د پوستکي نښې
د کلسیم کمښت پر پوستکي هم اغېز کوي. څېړنو ښودلې چې د هيپوکلسمي ناروغۍ د پوستکي د وچوالي، سوروالې او خارښت لامل کېږي.
۴- د نوکانو نازکتيا او د وېښتانو تویېدل
د کلسیم کمښت د دې لامل کېږي، چې نوکان د ډېر وچوالې له امله نرم او مات شي. مطالعو دا هم ښودلې چې د کلسیم کمښت د وېښتانو د تویېدلو هم لامل کېږي.
۵- د هډوکو ضعف
روښانه ده، چې د کلسیم کموالی د هډوکو د ضعيف کېدو لامل کېږي چې په پایله کې د «هډوکو د نرموالي» په نامه يوه ناروغۍ منځ ته راځي، ياده ناروغۍ ددې لامل کېږي، چې هډوکو خپله پیاوړتیا له لاسه ورکوي او د ماتېدو لامل یې کېږي.
۶- د غاښونو ستونزې
کلسيم سربېره پر دې چې د هډوکو په روغتيا کې رول لري، د غاښونو پر روغتيا هم مسقیم اغېز کوي. که چېرته بدن د کلسیم له کمښت سره مخ وي، بدن د خپلې اړتيا وړ کلسیم د غاښونو او هډوکو څخه اخلي. د کلسیم ټيټه کچه په بدن کې د غاښونو د خرابوالي او د دوی د رېښو د ضعيف کېدو لامل کېږي. که ماشومان د کلسیم کمښت ولري، کېدای شي د دوی غاښونه ژر وده نه کړي.
۷- خپگان
د کلسیم کمښت د مزاج (خوی، عادت) د بدلون لامل کېدای شي او د خپگان لامل کېږي.
کافي شواهد نشته، تر څو څرگنده کړي، چې د کلسیم کمښت د خپگان لامل گرځېدلی شي، خو ځينې څېړونکو د دوو ناروغيو ترمنځ اړيکه موندلې ده.
۲- نورې نښې
۱- په سینه کې د درد احساس؛
۲- په خوړلو (بلع) کې ستونزې؛
۳- په غږ کې بدلون؛
4- د پوستکي شديد خارښت؛
5- آب مرواريد (د سترگو يو ډول ناروغي)؛
6- ټوخی.
3- څه وخت ډاکټر ته مراجعه وکړو؟
هر هغه څوک چې د کلسیم د کمښت نښې نښانې تجربه کوي، باید ډاکټر ته مراجعه وکړي. ترڅو په وينه کې د کلسیم کچه معلوم شي، د لویانو په وینه کې د کلسیم نورمال اندازه باید د 8.8 او 10.4 mg / dL ترمنځ وي. خو ماشومان ډېر کلسیم ته اړتیا لري او د دوی د وینې کچه باید د 8.8 mg / dL څخه کم نه وي. شديد قبضيت، خوا ګرځېدل، په ورځ کې له 4 یا 5 ځله څخه ډېر کانگې، سرگړځېدل او ډېر خوب، د عضلاتو شديد انقباض، د ادرار زياتوالی، نس ناستی او د اشتها کمېدل د دغو نښو په کتلو سره تاسو باید ډاکټر مراجعه وکړئ.
4- د کلسیم د کمښت د مخنيوي لارې چارې
د کلسیم د کمښت د مخنیوي تر ټولو غوره لاره په غذایي رژيم کې د کلسیم سرچینې شاملول دي. تاسو کولای شئ د لبنیاتو، بادام، وچې انځير، سويا، شيدې او غوړ کب وکاروئ.
هغه څوک چې د کلسيم سرچينې په خپل غذايي رژيم نه شي ځای پر ځای کولای، یا د کلسیم لرونکي خواړو د خوړلو سره سره، دوی لا هم دا معدني عنصر نه لري، باید د کلسیم لرونکي ټابلیټونو څخه گټه واخلي.
په ځینو حالاتو کې دا غوره ده، چې د کلسیم ټابلیټونو سره ویټامين D وکاروئ، ځکه چې په بدن کې د کلسیم د جذب لامل کېږي، د کلسیم د کمښت له نښو څخه ممکن ستاسو په بدن کې د ویټامین D ټیټې کچې سره تړاو ولري.
