ليکنه: محمد اکرام لېوال
تر کومه ځايه، چې د نورو په وړاندې د غږيدا او ځان ته د هغوي د مخاطب کېدو خبره ده، نو ضرور ده، چې د هغوي پۀ وړاندې به د فشار او اغيز احساس هم را سره مل وي.
که څه هم ډير خلک د نورو پر وړاندې په غږيدا او وينا کې ډير مهارت لري او په دې برخه کې يې ډير تمرين هم کړی وي، خو بيا هم نظر خپلو مخاطبينو او نوي چاپيريال ته څه نا څه تر فشار او اغيز لاندې وي، يعنې هر چاپيريال او زمونږ د مخاطبينو هره طبقه حتا که دوی کوچنيان هم وي، د وينا په برخه کې، زمونږ پر روح او روان باندې خپل اغيز غورځوي.
اوس پوښتنه دا ده، چې څنګه د وينا پر مهال خپل سټریس/ فشار مدیریت کولای شوو؟
د دې پوښتنې د حل لپاره لاندې څو ځوابونو ته مراجعه کوو.
۱ د ټاکلې موضوع ډير تمرين او پرې حاکميت
تر ټولو لومړی هغه عنصر چې له مونږ سره زمونږ د ذهني او ارواحي فشار په را کمولو کې، مرسته کوي، هغه د خپلې موضوع ډير تمرين او پرې حاکميت دی. د موضوع په ډير تمرين او بيا – بيا يادولو سره د وينا مرکزي ټکي زمونږ په ذهن کې، ځای نيسي او د وړاندې کولو پر مهال په مسلسل ډول زمونږ پر ژبه باندې راځي، چې دا عمل مو پر ځان باور زياتوي او پرته له دې، چې خپل فشار پۀ نظر کې، ونيسوو، خپله وينا وړاندې کوو. همدا لامل دی، چې انګريزان ډير تمرين ته اهميت ورکوي او تکرار دا جمله وايي «More practice Make perfect»
۲ د وخته تلل
د وخته تلل هم له مونږ سره د وينا کولو اړوند د سټريس/ فشار پۀ کنټرول او مديريت کې همکار پاتې کېدلای شي. خپله وينا د غونډې ځای ته د وخته تلل دي، چې له مونږ سره مرسته کوي، څو خپل د وينا ځای اړوند ټول را پورته کېدونکي ګواښونه درک کړو، او د حل په موخه ورته ځان ورسوو، خاصتاً له دريځ سره اشنايي، د خپلو مخاطبينو پيژندل او په روحي او رواني لحاظ د ځان هوسا کول.
۳ خپلو مخاطبينو سره خوش طبعيتي کول
وړاندې له دې، چې وينا مو پيل کړئ، د دريځ پر سره له دريدو وروسته مخاطبينو ته تر ليدو وروسته داسې څه ووايئ، چې هغوی درته موسک (وخاندي) څو له دې کړنې څخه تاسو روحي ډاډ او تسکين حاصل کړئ، فشار مو پر جرآت بدل شي او مخاطبين درته ملګري ښکاره شي.
۴ د ورته مانایيزو کليماتو ټاکنه
د مترادفه او هم مانا کليماتو غوره کول له مونږ سره دا همکاري کوي، تر څو د وينا کولو پر مهال د لغاتو له کموالي سره مخ نه شوو او د وينا پيغام مو پرته له سټریس/ فشاره په ساده او عام فهمه لغاتونو سره تر خپلو اوريدونکو او مخاطبينو پورې ورسوو. تر څنګ يې دا ډول ټاکنه د وينا په جريان او روان حالت کې، زمونږ د ا، ان، اوو، ام او… په ژبه باندې د راتلوونکو غيرې مطلوبه غږونو د راتلو مخه نيسي.
۵ مکس (وقفه)
د دريځ پر سر د خبرو کولو پر مهال په خپلو خبرو او وينا کې، وقفه اخيستل يا د الفاظو د ادا کولو تر منځ واټن ايجادول، چې مکس (وقفه) ورته وايي، له مونږ سره دا همکاري کولائ شي، څو نورو خبرو ته ساه واخلو، موجود فشار ټيټ يا مديريت کړو او خپل مخاطبين په همدې فرصت سره له خپل نظره تېر کړو.
