حمیدالله حمیدي
د فاتح جومات چې د بحرین په لوی جومات مشهور دی د اسلامي نړۍ اتلسم لوی جومات بلل کېږي.
دغه جومات پر یو وخت د ۷ زره لمونځ کوونکو ظرفیت لري، چې لویه ګنبده یې ۲۲ متره مربع پرخوالی او ۱۶ متره لوړوالی لري. ګنبده یې له خالص فایبرګلاس څخه جوړه شوې، چې ۶۰ زره کیلو ګرامه وزن لري.
د فاتح جومات دوه لوړې منارې لري، چې لوړوالی یې تر ۷۰ مترو پورې رسېږي. دغه جومات په ۱۹۸۸مېلادي کال کې ګټې اخیستنې ته وسپارل شو، چې جوړولو یې ۵ کاله وخت نیولی. د محوطې پراخوالی یې (۱۵۰) زره متره مربع دی.
د بحرین لوی کتابتون هم، چې په ۲۰۰۶ کال کې بشپړه شوه د دغه جومات په څنګ کې موقعیت لري. پر کتابتون سربېره دوه دینې مدرسې هم د دغه جومات له ملحقاتو څخه شمېرل کېږي. له دغه جومات څخه په کال کې زرګونه کسان لیدنه کوي.
پر مسلمانانو سربېره ګڼ شمېر غیر مسلمان هم په داسې حال کې د دغه جومات لیدو ته ورځي، چې د احترام به خاطر یې سرونه پوښلي وي. توریستان کولی شي له جمعې او ځینو ملي ورځو پرته هره ورځ له دغه جومات څخه لیدنه وکړي.
د جومات غولی او ځینې دېوالونه پر اېټالیایي مرمرو پوښل شوي دي او دروازې یې د هندي ساج لرګي څخه جوړې شوې دي. د جومات داخلي چهل چراغ په اترېش کې جوړ شوی او د څنګ لامپونه یې له فرانسې څخه راوړل شوي دي.
