د نړۍ په بېلابېلو هېوادونو کې د انټرنېټ له ګډوډۍ یوه اوونۍ وروسته د انټرنټ خوندیتوب شرکت کراوډ سټرایک وايي، شاوخوا ۹۷ سلنه ستونزه هواره شوې ده.
مایکروسافټ شرکت ویلي و، د انټرنېټ دغه پراخه پرچاوي کې اته نیم میلیونه کمپيوټرونه اغېزمن شوي دي.
د کراوډ سټرایک شرکت په یوه سافټویر کې د ستونزې له کبله یوازې په امریکا کې پنځه نیم میلیارد ډالره زیان اوښتی دی.
د دغه شرکت مشر جورج کورتز وايي، نږدې ټول سیستمونه بېرته عادي حالت ته ستانه شوي او لا هم کار روان دی چې ستونزه په بشپړ ډول حل شي.
د انټرنېټ دا پراخه ګډوډي چې د لامل په اړه یې لا هم څېړنې روانې دي، د لویې اندېښنې لامل شوې او ځینې کارپوهان وايي دې ته اندېښمن دي چې دغه پېښه بیا تکرار نه شي.
د انټرنټي خوندیتوب یا سایبر سیکیوریټي شرکت کراوډ سټرایک مشر جورج کورتز پر لینکډین ټولنیزه پاڼه لیکلي، ۹۷ سلنه کمپیوټرونه چې د دوی سافټویر کاروي، بیرته پرلیکه او فعال شوي دي.
وړاندې مایکروسافټ شرکت ویلي و چې د کراوډ سټرایک په سافټویر یا کمپيوټري پروګرام کې د ستونزې له کبله څه باندې اته نیم میلیونه کمپیوټرونه غېر فعال شوي وو.
په نړیواله کچه د انټرنټ د دې پراخې پرچاوۍ له کبله چې د تیرې اونۍ پنجشنبې او جمعې ورځو کې پېښه شوه، د ګڼ شمېر بانکونو، هوايي شرکتونو او خپرنیزو ادارو ورځنۍ چارې په ټپه ودرېدې.
اوس د کراوډ سټرایک مشر وايي، یوازې دوه نیم لکه کمپيوټرونه غیر فعال پاتې دي او پاتې بیرته عادي حالت ته ستانه کړای شوي دي.
هغه د خپلو پیرېدونکو او کارکوونکو د صبر او نه ستړې کېدونکو هلو ځلو مننه کړې او یو ځل بیا یې د ستونزې پېښېدو له کبله بخښنه غوښتې ده.
دغه شرکت د مننې په پار خپلو او د همکارو شرکتونو هر کارکوونکي ته لس ډالره ډالۍ کړې.
نوموړي لیکلي، هڅه کوي چې پر ستونزو غور وکړي، ګټور ګامونه واخلي او په بیړني ډول یې حل کړي.
ورته وخت کې هغه ومنله چې د شرکت یې تراوسه په بشپړ ډول نه دی توانیدلی چې ستونزه حل کړي.
د دغې ستونزې بشپړ هوارول کافي وخت نیسي.
مایکروسافت او کراوډ سټرایک شرکت د دې ستونزې له رامخ ته کېدو څلېرویشت ساعته وروسته یو ګډ حل شریک کړ او له کاروونکو یې وغوښتل چې خپل کمپیوټرونه په سیف موډ یا خوندي حالت کې چې د وینډوز پرګرام ځانګړی حالت دی، چالان کړي او هغه فایلونه له کمپيوټرونو لرې کړي چې له کاره غورځېدلي.
خو دا حل خلکو ته ستونزمن بلل شوی دی.
ورپسې مایکروسافت یو پروګرام خپور کړ چې په مټ یې دغه بهیر چټکیږي.
د کراوډ سټرایک شرکت مشر ویلي، د دغه پروګرام په مټ عادي حالت ته د کمپیوټرونو ستنلو بهیر چټک شوی دی.
هغه ویلي، داسې ګامونه یې اخیستي چې د ورته ستونزې د تکرارېدو مخنیوی وشي.
