د هرات ځايي مسوولین وایي چې د هرات – خواف د اوسپنې پټلۍ د لومړي فاز جوړولو چارې له ۸۰ سلنه زیاتې بشپړې شوې دي.
د مسوولینو په وینا چې دغه فاز ۴۳ کیلو متره اوږدوالی لري او د جوړولو چارې به یې د راتلونکو پنځو میاشتو په موده کې بشپړې شي.
په ورته وخت کې ددې پروژې یو انجینر ویلي چې د دې فاز د پورتنۍ برخې کارونه هره ورځ له ۳۰۰ تر ۳۵۰ مترو پورې بشپړېږي.
د هغه په وینا چې د دې فاز د جوړولو لپاره د اړتیا وړ توکي له ایران هېواد څخه راوړل شوي دي.
بلخوا د هرات مسوولینو دا ډاډ هم ورکړی چې د دې پروژې کارونه به تر راتلونکو پنځو میاشتو بشپړ شي.
د هرات – خواف اوسپنې پټلۍ د هرات صنعتي ښارګوټی له نړۍ سره نښلوي، چې له بېلابېلو هېوادونو د خامو توکو وارداتو او د هرات تولیدي توکو صادراتو په برخه کې ارزښتناک بلل شوی دی.
