راپور: نعمت الله رحیمي
چهارشنبه، د حوت۱، ۱۴۰۳ل
د اکسوس کتابپلورنځي لخوا د “کډوالي” کتاب مخکتنه د لسګونه فرهنګي ځوانانو په شتون کې د یوې غونډې په ترڅ ترسره شوه.
د غونډې دریځ چارې عبدالوهاب مومند پر مخ وړلې او پرانیستغونډه د ډاکټر صاحب فضل باري سیرت په ښکلي تلاوت او د قرآن عظیم الشان په څو آیتونو باندې پیل شوه.
د لومړي ویناوال په توګه د اکسوس فرهنګي مسؤل “صفي الله ناصري” د یاد او نورو کتابونو په روانو چارو باندې خبرې وکړې. د کتاب لوستونکي «لیکوال او خبریال» صادق ودان د کډوالي کتاب په دې برخې باندې معلومات ورکړل چې د لوست پر مهال دغه کتاب د لویدیځ مهاجرت، د هویت پېژندنې او په خپل هېواد کې د اوسېدو په اړه څه ور زده کړي دي. ښاغلي غازي محمد منندوی د کډوالي کتاب په علمي هڅې، اړتیا او ملي مسایلو بحث وکړ. د غونډې درېیم ویناوال لیکوال او ادیب محمد نور منګل و، چې د یاد کتاب د نثر په روانوالي او هڅې خبرې وکړې او د لوست پر مهال یې د هېڅ نه ستړیا یادوونه وکړه چې اوسني علمي کتابونه باید پر همداسې نثر استوار وي. د کډوالي اثر لیکوال ډاکټر صاحب وحید وطنیار په څلورو فکټورونو “ګواښونه، ننګونې، تمې او حقیقتونه” ژور بحث وړاندې کړ او د غونډې نورو ویناوالو د وینا او ځواب مننه وکړه.
په پای کې د غونډې ارزونې او دعایې لپاره ښاغلي محمد یاسین امین ته بلنه ورکړل شوه چې د یادې مخکتنې هر اړخیزه ارزونه او دعایه وکړي، چې له همدې سره غونډه پای ته ورسېده.
د کتاب په شا پوښتۍ باندې لیکل شوي:
“دا کتاب لوستونکو ته د کډوالۍ د پېچلو واقعیتونو ژوره پوهه وړاندې کوي چې د کډوالو پر کلتوري، ټولنیزو او احساساتي ننګونو رڼا اچوي او د دوی له کیسو سره د خواخوږۍ او ژورې اړیکې احساس راپاروي. همدارنګه د پېژندګلوۍ، ادغام او د بې ځایه کېدو د تلپاتې اغېزو په انتقادي تحلیل سره دا کتاب د لوستونکو لپاره په نوي لیدلوري بحث کوي چې غواړي د کډوالۍ د پېچلتیاو او د هغه د فردي او ټولنیزو اغېزو ژور درک ترلاسه کړي.”
