ژباړه: ګلثوم محمدي
ام په نړۍ کې د مشهور او خوندورو مېوو په ډله کې راځي، چې د ځانگړي خوند، رنگ او بوی په لرلو سره له مغذي موادو څخه مالامال دي. د دې مېوه اصلي ځای هند او د اسیا سويل ختيځ گڼل کېږي. دا استوايي مېوه چې د مېوو پاچا بلل کېږي. په بېلابېلو مغذي موادو بډايه ده، چې د بدن د روغتيا لپاره خورا گټور تمامېدای شي. ام سربېره پر درمليزې ځانگړتياوې تغذيي ارزښت هم لري.
ام د مغذي موادو بډايه سرچينه
ام په خپل ترکيب کې په زياته کچه ويټامين C لري، چې د بدن ايمني سیستم سالم ساتي او د اوسپنې په جذبولو کې مرسته کوي. په ام کې شته فولاټ د DNA په توليد کې او همدارنگه د جنين د ودې لپاره خورا گټور تمامېدای شي. دغه مېوه په خپل ترکیب کې گڼ شمېر معدني مواد هم لري. په دغه مېوه کې د پوټاشیم شتون د دې لامل کېږي چې د وينې فشار منظم شي، د عصبي سیستم د ښې فعاليت لامل کېږي او زړه د ناروغيو مخنيوی وکړي.
ام د آمیلاز او اینورتاز انزايمونو په لرلو بدن سره مرسته کوي، چې خواړه تجزيه کړي او بدن ته په اسانۍ سره جذب شي.
سربېره پر دې، په دې مېوه کې شته پلي فنول د کولمو التهاب کموي او همدارنگه په دې مېوه د فايبر شتون د قبضیت په ښه کولو کې مرسته کوي.
ام د ویټامین C، انتیاکسیدان او د باکتريا ضد ترکیباتو په لرلو سره د مخ د پوستکي پر روغتيا او ښکلا باندې خورا ښه اغېزه لرلای شي. په دغه مېوه کې د ویټامین C شتون د کلاژن په توليد کې مرسته او د چين او چروک په کمولو کې مرسته کوي. ام د آکنه يا بخار د درملنې لپاره هم مؤثر تمامېږي. تاسو کولای شئ ام د طبیعي ماسک په توگه وکاروئ.
خو د هغه کسانو لپاره یې د زیات خوراک سپارښتنه نه کېږي، چې د ديابت یا د شکر ناروغي لري ځکه دغه مېوه په خپل ترکيب کې په زياته کچه طبیعي قند لري، خو که په مصرف يې اعتدال رعايت شي بیا دومره بده اغېزه نه شي کولئ.
په ټولو کې ويلای شو، ام د فولاټ، مس، ويټامين C، ويټامين A، ويټامين B6 او ويټامين E په لرلو سره بدن ته خورا گټور تمامېدای شي. د دې مېوې کارول د ايمني سیستم د پياوړتيا، د عصبي سیستم د ښې فعاليت او د زړه د روغتيا لامل کېږي.
