استاد ګل رحمن رحماني
سریزه او لنډيز
سریزه او لنډيز د یوې مقالې دوې مهمې برخې دي چې متفاوتې موخې او جوړښت لري. سریزه یا مقدمه لوستونکی د مقالې له موضوع او موخې سره اشنا کوي، حال دا چې لنډيز د ټولې مقالې لنډون وړاندې کوي.
د سریزې ځانګړنې دادي:
پام اړونه: سریزه باید په یوه جذابه جمله یا پوښتنې سره لوستونکی ځان ته جلب کړي.
د مسالې بیان: په روښانه او څرګند توګه د مقالې اصلي موضوع یا مسئله معرفي کوي.
د موضوع اهمیت: د موضوع اهمیت او د څېړنې اړتیا یې توضیح کوي.
د مقالې موخې: د مقالې موخې او فرضیې بیانوي.
تېرو څېړنو ته کتنه یا مخینه: په لنډون سره د موضوع اړوندو پخوانیو څېړنو ته اشاره کوي.
روشن پېژندنه: په لنډون سره د څېړنې روشونه او د ډیټا د را ټولنې طریقه شرحه کوي.
د مقالې جوړښت: د مقالې د جوړښت کلي نقشه وړاندې او اصلي اجزا یې معرفي کړي.
د لنډیز ځانګړنې:
لنډيز باید د ټولې مقالې لنډون وي او لوستونکی د مقالې له اصلي منځپانګې سره اشنا کړي.
د لنډيز جوړونکې برخې درې دي:
موضوع او هدف: د مقالې د اصلي موضوع او موخې په اړه وضاحت ورکړي.
روش پېژندنه: د څېړنې روشونه او د معلوماتو د راټولنې چاره په لنډون سره شرحه کړي.
پایلې: اصلي پایلې او د مقالې کلیدي موندنې بیانوي.
بنسټيزې کلمې: هغه کلمې چې د مقالې موضوع پورې اړوندې دي او ډېرې تکرار شوې دي.
د کلمو محدودیت: لنډيز باید له ۱۵۰ څخه تر ۲۰۰ کلمو پورې وي.
مهم ټکي:
سریزه او لنډيز باید په څرګند او لنډ ډول ولیکل شي.
له تخصصي او پېچلو اصطلاحاتو راوړلو څخه ډډه وشي.
سریزه او لنډيز باید په علمي روانه ژبه ولیکل شي.
په سریزه کې باید په لنډون سره د څېړنې مخینه او د اوسنۍ څېړنې حیثیت او مقام ولیکل شي.
لنډيز باید د مقالې کره او بشپړ لنډون وي او لوستونکی د مقالې له اصلي برخې څخه خبر کړي.
