سوی تاج تر دوه زره کلونو وړاندې زمانې داستان دی، د یوه ملک، یوې پاچاهۍ، د اشخاصو، قبیلو او ټولنیز نظام کیسه ده چې په کې فکر، احساسات، حماسه، عشق، د قدرت لوبه او ډېرې نورې خبرې شته دي.
دغه ناول ښاغلي عبدالستار سعادت لیکلی، ۳۲۶ مخونه لري او اکسوس کتابپلورنځي تازه چاپ او خپور کړی دی.
په دې ناول کې د کرکټرونو او ځایونو نومونه تخیلي دي. په داستان کې د کلاسیسیزم، ریالیزم، جادویي ریالیزم او ځای – ځای د تورې کمېډۍ څرک لیدل کېږي.
په «سوي تاج» ناول کې تر کرکټرونو، موضوعات ډېر مرکزي نقش لري چې دا په پښتو ناولونو کې نوی پیل ګڼلی شو؛ خو داسې هم نه دي شوي چې د مسایلو فکري ژورتیا د داستان جذابیت باندې منفي اغېز کړی وي، په داسې ډول لیکل شوی چې پیلول یې لوستونکی تر پایه له ځان سره وړي.
