د اوبو او انرژۍ وزارت وایي چې په هېواد کې د وروستیو پرلهپسې ورښتونو له امله په ننګرهار ولایت کې څو اوبیز کوچني بندونه (چکډېمونه) له اوبو ډک شوي دي.
د دغه وزارت په اېکسپاڼه لیکل شوي چې د وروستیو اورښتونو له کبله د هېواد په بېلابېلو سیمو کې په اوبیزو سرچینو کې د پاموړ زیاتوالی راغلی چې تر ځمکې لاندې اوبو سرچینو د پیاوړتیا، د کرنې د غورهوالي او د اقتصادي ودې لپاره ګټور بلل شوي دي.
د اوبو او انرژۍ وزارت په خبرپاڼه کې راغلي چې دا کوچني بندونه په تېرو کلونو کې د هېواد په بېلابېلو سیمو کې د اسلامي امارت له لوري جوړ شوي دي.
د یادولو ده چې د اوبو کوچني بندونه (چکډېمونه) د موسمي سیلابونو په کنټرول، د اوبو سرچینو د مدیریت او د ځمکې لاندې اوبو د بیا تغذیې په برخه کې مهم بلل کېږي.
د خبرپاڼې له مخې چې افغانستان په وروستیو کلونو کې د اقلیمي بدلونونو او پرلهپسې وچکالیو له کبله د اوبو له جدي کمښت سره مخ و، خو وروستیو ورښتونو اوبیز وضعیت ښه کړی دی.
