د پنجشېر – تخار سړک رغنیز کارونه د څه باندې ۴۵۱٫۶ میلیون افغانیو په ارزښت پیل شوي دي.
د ټولګټو وزارت د خبرپاڼې له مخې چې دا سړک ۲۵ کیلومتره اوږدوالی لري او چارې یې د ځايي مسوولینو په شتون کې پیل شوې دي.
سرچینې لیکلي چې یاد سړک د پنجشېر ولایت پریان ولسوالۍ له خاواک سیمې څخه پیل او د تخار ولایت تر ورسج ولسوالۍ پورې رسېږي چې په اوږدو کې د یو شمېر پلګوټو او استنادي دېوالونو د جوړولو چارې هم شاملې دي.
د ټولګټو وزارت مسوولینو همداراز ویلي چې د دغه ۲۵ کیلومتره اوږد سړک د رغنیزو چارو پرمهال به د سیمې یو شمېر اوسېدونکو ته کار زمینه هم برابره شي.
بلخوا د پنجشېر یو شمېر اوسېدونکو د دغه سړک د چارو پر پیلېدو خوښي ښودلې او د ورته پروژو د پرانیستې غوښتنه یې کړې ده.
