د عامې روغتیا وزارت خبر ورکړی چې د ملګرو ملتونو د ماشومانو ملاتړ ادارې (یونیسف) په مالي ملاتړ د هرات ولایت په تورغنډۍ روغتیايي مرکز کې د خوارځواکو ماشومانو درملنې څانګه پرانیستل شوې ده.
د دغه وزارت په اېکسپاڼه لیکل شوي چې د یادې څانګې پرانیستل د ماشومانو د مړینې کچې کمولو او د تغذیې وضعیت د ښهوالي په برخه کې یو مهم ګام بلل کېږي.
د خبرپاڼې له مخې چې د یونیسف په ملاتړ دا فعاله شوې څانګه به د بسترونو په لرلو سره هلته د روغتيايي خدمتونو د کیفیت په لوړولو کې اغېزمن رول ولوبوي.
د یادولو ده چې د اسلامي امارت له بیاځلي واکمنېدو وروسته په ټول هېواد کې د روغتونونو، روغتیايي مرکزونو د جوړېدو او د بېلابېلو ناروغیو د درملنې لپاره د ورته څانګو پرانیستل کېدل زیات شوي دي.
