د اوبو او انرژۍ وزارت مسوولین وایي چې د ارغندي د ۵۰۰ کیلو ولټه بريښنا د سبستېشن ودانیزو چارو تر بشپړېدو وروسته به د برېښنایي وسایلو نصبول هم پیل شي.
د یاد وزارت د ویاند، مطیع الله عابد ویلي چې د دې سب سټیشن ودانیز کارونه په چټکۍ پیل شوي او تر راتلونکو دوو میاشتو به بشپړ شي.
د هغه په وینا چې د ارغندي ۵۰۰ کیلو ولټه سبسټیشن خبرې له یوه هندي او کورني شرکت سره شوې دي.
څه موده وړاندې د دې پروژې پرانیسته وشوه او د دې په ګډون په یو شمېر نورو پروژو سره به له ترکمنستانه د زر میګاواټه برېښنا واردولو ته زمینه برابره شي.
هغه مهال د سرپرست حکومت مسوولینو ویلي وو چې د دې سبستېشن په فعالېدو سره به د برېښنا ډېرې ستونزې حل شي.
بلخوا یو شمېر کارپوهان په کلیدي ځایونو کې د ورته سبستېشنونو جوړېدل مهم بولي، او د دې ترڅنګ په کور دننه د برېښنا پر تولید هم ټینګار کوي.
