ژباړن: محمد حامد بهیر
له غوسه ناڪو او ځان خوښوونڪو خلڪو سره ژوند د هغه ساعتي بم مثال لري، چې هر شېبه یې د چاودېدلو خطر وي؛ تاسې به تل په فشار، استرس، اضطراب، وېره، او وحشت کې وی، هره شېبه به په دې ډار ڪې وې چې هغه غوسه نه شي او هر څه ګډوډ نه ڪړي.
د غوسه ناڪو خلڪو ځانګړنې
۱: غوسه ناک خلڪ تل بې حوصلې وي، پنځه دقیقي زغم نه شي کولای، ڪله چې دوی ته کوم څه په وخت په لاس ورنه شي، نو په سمد لاسه په تاوتریخولي پیل کوي او دا به له هغې موضوع سره هېڅ تړاو ونه لري په کومه چې دی غوسه کېږي.
۲: غوسه ناک خلڪ نیوڪه نه خوښوي، د هر ډول ساده نیوڪې په مقابل ڪې اور پرې بلېږي، له خونې وځي، اړیڪه پرې کوي، غصه ڪېږي او هر څه چې یې په لاس ڪې وي په ځمڪه یې ولي، په زړه ڪې یې یوازې دا خبره وي چې څنګه له نیوڪې ڪونڪي څخه خپل غچ واخلي.
۳: د غوسه ناڪو خلڪو ژوند د ډېر بدلون په لوري روان دی، مثلاً: هر وخت چې له ملګرو سره په ڪوم مجلس ڪې وي، ناڅاپه یوه تراژیدي موضوع مخڪې ڪې راځي، چې دی پرې غوسه ڪېږي.
۴: ڪوم ځای چې هغه یې دخپل هر څه سرچینه بولي، په هغه ځای ڪې دنورو د تیروتنو زغم نه لري، دا فڪر ورسره وي چې هلته باید هېڅوک ڪومه تېروتنه ونه ڪړي او د هغوی د تېروتنې سره سم هغوی ګواښي او رټي یې.
۵: غوسه ناک خلک په ټولنه او هر ځای ڪې ډیر ڪم ڪولای شي چې د خپلې غوسې مخه ونیسي، هغوی خپل اولادونه د یوې وړې تیروتنې له امله رټي او ګواښي يې، همدارنګه له نورو سره هم د یوې ساده تیروتنې په خاطر هغوی ته له حده وتلې بدې خبرې کوي، چې په پایله ڪې آن د یو بل په وهلو پیل کوي.
له غوسه ناڪو خلڪو سره ژوند له انسان څخه یو رټل شوی موجود جوړوي، د هغوی ځان ته درناوی او په ځان باور له منځه وړي، په پای ڪې داسې ڪېږي چې له خپل درون څخه ووځي، او له ځانه پردی شي.
