خاطره لیکنه د لیکوالۍ له ځانګړو بڼو څخه ده، چې ګڼ کسان یې د خپلې ذهنې پانګې او تجربو پر بنسټ لیکنې ته مخه کوي. په دې کې شک نشته چې د هر انسان ژوند له لوړو ژورو سره مل دی او هر چا د ژوند یو مسیر شاته پرېښی دی، ځکه خو کله کله کوښښ کوي چې یوه ورځ یې ولیکي او له دې لارې خپلې موندنې له نورو سره ووېشي، په دې چې د انسان د ژوند یوه مهمه برخه په خاطرو کې پټه ده او هېڅکله یې له ځان څخه نه شي جلا کولی. دې موضوع ته په پام سره د خاطرو لیکنې په چاره کې ځینې ټکي یادوو چې د خاطره لیکنې د مینه والو لپاره به ګټور وي.
له کمونې او زیاتونې پرته یې ولیکئ: د خاطره لیکنې پر مهال د خاطرې پیاوړي اړخونه په خپل ذهن کې را غونډ کړئ او بې له کومې زیاتونې او کمونې یې ولیکئ.
خاطره مو ساده او څرګنده ولیکئ: خاطره لیکنه د نورو هر ډول لیکنو خلاف ساده او روښانه ژبه غواړي، څو په مخاطب کې د لوستنې پر مهال په لوستونکي کې شور او جذبه را منځته کړي.
د خاطره لیکنې پر مهال دودیز مصطلحات وکاروئ: د مثال په ډول تاسې د یوه کس، یوه کلي یا یو څه په اړه خپله خاطره لیکئ، تر ټولو وړاندې د همغه شخص، د کلیو د اوسېدونکو او په ژبه کې دودیز مصطلحات یا هم همداسې نور موردونه په ډېر ظرافت سره ولیکئ. زه چې هر ځل د ارواښاد رهنورد زریاب خاطرې لیکم، د هغه حرکتونه، د خبرو روش، ځینې شوخۍ لکه «ساتت تیر اس!» او نورو کړنو ته چې د هغه څېره ورسره مجسمه کېږي، ذهن ته را ولم، یعني دې ته دقت کوم چې د نوموړي په شخصیت کې څه ځانګړنې وې چې اوس یې د لوستونکي د زړه راښکونتیا او ذایقې لپاره کارولی شم. دې ټکي ته پاملرنه په حقیقت کې زموږ خاطرې په لیکنۍ بڼه پیاوړې کوي او لوستونکی یې هم په جذابیت سره لولي.
له حاشیو څخه تېر شئ: کله کله په خاطره لیکنه کې زیاتو حاشیو ته تګ د متن محتوا ته له ورننوتو څخه مخنیوی کوي، غوره به دا وي چې مخامخ له متن څخه پیل وشي او لوستونکی حاشیو ته ارجاع نه کړو، ځکه چې د لوستونکي او متن تر منځ فاصله راوړي او په حقیقت کې د محتوا پیغام رسول ځنډني کوي.
خپلې موندنې ولیکئ: په خاطره لیکنه کې باید خپلې رښتینې او واقع بینانه موندنې ولیکئ، د نورو له لیکنې سبک نه تقلید د خاطرې خوند ته زیات رسوي.
په خوند یې ولیکئ: که څه هم په خوند سره لیکنه د ژوند اوږده تجربه غواړي، خو د دا ډول لیکنې یوه کیلي خپله د لیکوال په ذهني ظرفیت او ظرافتونو تکیه کول دي. دا باید هېره نه کړو چې هر لیکوال د خپل ماحول له پدیدو، روایتونو او پېښو څخه ځانګړي ظرفیتونه او ظرافتونه لري، چې ثبت یا قلمبند کول یې په لیکنه کې د خوند سبب ګرځي. مثلا خاطرو کې د شفاهي پانګې لکه متلونه او کنایې راوړل زموږ د لیکنې خوند زیاتوي.
لنډ لیکنه: په خاطره لیکنه کې لنډون تر هغه ځایه مجاز ده چې روایت تحریف نه کړي او جذابو اړخونو ته یې زیان ونه رسوي، که داسې وي بیا نو هره خاطره د خپل ځانګړي لیکنې سبک او سلیقې پر بنسټ کوښښ کوي چې لوستونکي ته له جاذبې ډکه پاتې شي.
یادونه: دلته باید پام وکړو چې خاطره لیکنه د روایت یوه بڼه ده، کوم داستان یا داستاني طرحه نه ده، چې داستاني ژانر رعایت کړي، ځکه وینو چې کله کله ځینې خاطره لیکونکي د داستان او خاطرې تر منځ توپیر نه کوي او په سبب یې هره خاطره داستان ګڼي، حال دا چې داستان د موضوع او روایت اوچته هنري او غوړېدلې لیکنۍ بڼه ده، چې لیکنه یې د خاطرې په څېر اسانه نه وي.
