کله چې موږ د غوره انسان په اړه غږېږو؛ عموماً د هغو خلکو څخه خبرې کوو، چې د پام وړ پرمختگ یې کړی وي. د بريالي انسان تعريف د ټولو لپاره يو شان نه دی. تاسو ممکن د بريالي انسان تعريف د انسان په معنوي وده کې ووينئ، يا هم په ځواک يا شهرت کې، يا هم له ژوند څخه د انسان په خوښۍ کې. د دې تعريفونو څخه هېڅ يو غلط يا رښتيا نه دي، مگر هر څوک په خپل ذهن کې بېل تعريف لري. په دې لیکنه کې به د بريالي انسان پر ځانگړتياوو بحث کوو او تاسو د بريالي انسان په هلکه مفصل معلومات ترلاسه کولای شئ.
په ټولنه کې د بريالي انسان اصلي ځانگړتياوې
۱- موخه درلودل او خپلو موخو ته د رسېدو لپاره پلان جوړونه؛
۲- هڅه کول او د پرمختگ لپاره استقامت؛
۳- د وخت مديريت؛
۴- پر ځان باور (اعتماد به نفس) او په خپلو وړتياوو باور لرل؛
۵- دوامداره زده کړه؛
۶- پوهه او مهارتونه؛
۷- خلاق فکر او مثبت لید؛
۸- له نورو سره د موثره او متوازن خبرو اترو وړتيا.
ويلای شو، بريالی انسان هغه څوک دی، چې پلان جوړوي او د پلان په پلي کولو سره خپلو موخو ته ځان رسوي او په ژوند کې د ډاډ او رضايت احساس کوي.
۲- د غوره او بريالي انسان وړتياوې
د خپلو موخو د رسېدو لپاره کومو وړتياوو ته اړتيا لري او کوم کارونه بايد ترسره کړي.
۱- انگيزه او قوي اراده:
که غواړي له ننگونو څخه تېر شئ او په يوه غوره انسان بدل شئ. ستاسو لومړنی گام باید دا وي چې انگيزه او قوي اراده ولرئ، د خپلو موخو د رسېدو لپاره غوره ده چې ستاسو انگيزه دروني وي او دا انگيزه د دې لامل کېږي چې تاسو پرله پسې هڅو ته اړ کړي.
۲- پر ځان باور
بريالی انسان پر خپلو وړتياوو باور لري او کله چې له خنډونو سره مخ کېږي، نو همدغه پر ځان باور لامل کېږي چې له ننگونو څخه تېر شي.
۳- انعطاف او د خطر زعم
د بريالیو خلکو یوه ځانګړنه دا ده چې دوی د هر خطر او بدلون منلو ته چمتو وي او د دې وړتيا لري چې په چتکۍ سره ځان له نويو شرايطو سره سازگار کړي.
۴- سازماندهي او د وخت مديريت
بريالي خلک خپل وخت په ښه توگه مديريت کوي، دوی په سازماندهي او پلان جوړولو کې وړتيا لري او د پلان په پلي کولو کې هم منظم دي.
۵- دوامداره زده کړه
غوره خلک د ننگونو د لرې کولو لپاره له خپلې پوهې او مهارتونو څخه گټه اخلي.
۶- خلاقیت او نوښت
که تاسو هم غوره اوسېدل غواړئ، نو تاسو اړتيا ده چې خپل خلاقیت ته وده ورکړئ.
ويل کېږي، چې له ننگونو څخه د وتلو او خنډونو د لرې کولو لپاره تر ټولو مهم څه چې بايد ترسره شي، هغه تخليقي فکر لرل او د نويو نظریو او نظرونو موندل دي.
۷- استقامت او پشتکار
بريالي خلک د ماتې په وخت خپل ثبات او استقامت ساتي، له هرې ماتې وروسته دوی پورته کېږي او خپلې لارې ته دوام ورکوي او همدغه کار د دوی توپير له عادي خلکو سره ښيي.
۳- څنگه په يوه غوره انسان بدل شو؟
ځينې ځانگړي موارد شته چې له موږ سره مرسته کوي، چې په خپل ژوند کې پرمختگ وکړو او په يوه غوره انسان بدل شو.
۱- روښانه موخه ټاکل
خپل اهداف په ځانگړي ډول تعریف او تعقیب کړئ، دا به له تاسو سره مرسته وکړي، ترڅو د خپلو موخو لپاره پلان جوړ کړئ او په خپلو موخو تمرکز وکړئ.
۲- د مثبتو عادتونو ايجادول
مثبت عادتونه، لکه پلان جوړونه، د پلان په پلي کولو کې نظم، د وخت مديريت او همدارنگه د ژوند په بېلابېل اړخونو کې نظم ايجادول.
۳- په ځان باور
خپل وړتيا او ځواک مشخص کړئ، پرې متمرکز شئ او پر ځان باور لوړ کړئ. اړينه ده چې ستاسو ځواک او وړتيا رښتيا وي.
۴- د ماتې احتمال او دننگونو منل
له ناکامۍ او ماتې څخه مه وېرېږئ. د نوي ننگونو او نوي حالاتو د منلو لپاره چمتو واوسئ.
۵- د پخوانيو تجربو کارول
هر ځل ماتېدل د نوي ژوند پيل وي. له ماتې څخه وېره مه کوئ او د تجربې په توگه يې وکاروئ.
۶- له نورو سره مثبتې اړيکې درلودل
له لوړو او الهام بخشو خلکو سره اړيکه او د دوی له تجربو څخه گټه اخیستل.
۴- د خلاقیت د پياوړتيا لارې
يو له هغو مهمو موضوعاتو چې مخکې ورته اشاره وشوه، دا وه چې يو غور انسان بايد تخليقي فکر ولري.
ټول انسانان خلاقیت لري، ځکه خلاقیت ذاتي وړتيا ده، خو مهمه خبره دا ده چې خلاقیت روزنې ته اړتيا لري.
د خلاقیت د روزلو ځينې مهمې لارې:
۱- د نويو تجربو منل
تخليقي خلک ليواله دي او تل د نويو شیانو او بېلابېلو تجربو په لټه کې دي. چې همدا د تخلیقي او فعال ذهن د لرلو لامل کېږي.
۲- د فکر روزنه
د فکر روزنه د متنوع او بېلابېلو نظرونو د توليد په معنا ده. موږ کولای شو خپل فکر د ځينو فعاليتونو په کولو سره پياوړی کړو، لکه دماغ طوفان، يعنې ټولو مسایلو ته گړندی او مداوم فکر کول.
۳- په تخليقي ډول د ستونزو حل
په تخليقي او نوښتگر ډول د ستونزو حل کول، دا هم د خلاقیت په روزنه کې مرسته کولای شي.
۴- زده کړه او تجربه
تخليقي خلک له تجربو څخه گټه اخلي، دوی د نوي شیانو له تجربو څخه خوند اخلي، دا تجربې به له نویو زده کړو ډکې وي او کولای شي د تخليقي نظرونو لامل شي.
۵- له هڅونې او ملاتړ څخه گټه
په هغه چاپېريال چې خلاقیت ته اهميت ورکول کېږي، ملاتړ او هڅول کېږي، کولای شي د خلکو په روزنه کې مرسته وکړي.
۶- انگيزه درلودل
هغه کسان چې تخليقي فکر لري، معمولاً د خپلو موخو لپاره ځانگړې ليوالتيا او انگيزه لري او همدغه انگیزه د دې لامل کېږي، چې د دوی ذهن د موخو د رسېدو لپاره ډېر کار وکړي.
