ژباړه: حمیدالله حمیدي
د ښه ملګري درلودل په ژوند کې تر ټول ښه تجربه ده. د لرغوني یونان مشهور فیلسوف ارسطو وایي، ښه ملګری په بدن کې د روح په څېر دی. خو ایا تر اوسه مو په دې اړه فکر کړئ، ټول هغه کسان چې د ملګرو په لېست کې مو دي، په ټوله مانا د یوه ښه ملګري صفتونه لري او که نه؟ په دې اړه مو هم فکر کړی، چې کوم ملګری به مو د مرګ تر ورځې پورې در سره وي؟
په دې لیکنه کې د ښه ملګري ځینې ځانګړنې بیان شوې دي، وګورئ چې تاسو هم د یوه ښه ملګري ځانګړنې لرئ او که نه؟
۱- ښه ملګری را سره مرسته کوي تر څو پر ځان مهربانه اوسو
ښه ملګری هغه دی چې پر ځان مهرباني کول را زده کړي. کېدای شي په وروستۍ کاري مذاکره کې ښه نه وی ځلېدلی، نور پر ځان غوسه یاست.موږ ډېری دا عادت لرو چې کله رانه یوه تېروتنه کېږي، ځان ځورو او خپه و. په داسې وختونو کې یو ښه ملګری کولی شي د خپل ځان په اړه زموږ فکر بدل کړي. که فکر کوئ له ځانه مو بد راځي، یوه ښه ملګری کولی شي داسې احساس درکړي، چې له ځان سره مینه وکړئ. کله چې موږ له ځان سره مینه کوو، هغه ده چې بیا له نورو سره مینه کول او ښه رویه کول راته اسانه کېږي.
۳- ښه ملګری مو تېروتنې راته په ګوته کوي
ډېر کله موږ داسې کړنې تر سره کوو، چې فکر کوو، ښه کار کوو. خو که ښه ملګری ولری، دا درته په ګوته کوي چې څه ډول او پر کوم لوري روان یاست. ښه دوست د تېروتنې د پر ګوتې کولو پر مهال د حسادت له مخې دسر چلند نه کوي، بلکه له ورایه یې په خبرو کې صداقت، ريښتینولي او اخلاص ښکاري.
۳- ښه ملګری له تاسو سره د ناستې پر مهال د بل هېڅ شي په اړه فکر نه کوي
ښه ملګری مو حواس متمرکز کوي. ښه ملګری هغه دی چې له تاسو سره د ناستې ولاړې پر مهال د بل هېڅ شي په اړه فکر نه کوي، داسې چې فکر کوئ، تمرکز او تاسو ته پاملرنه یې د ژوند یو حیاتي اصل دی. ښه ملګری د خپلو اړتیاو په پام کې نیولو سره د ملګري اړتیاوې او غوښتنې هم په پام کې نیسي او پوره پاملرنه ورته کوي. نو کله چې له ملګري سره پر خبرو بوخت وی، موبایل مو په جېب کې ساتئ، تر څو ورته بې توجه ښکاره نه شئ. هغه څېړنه چې په ۲۰۱۷ کال کې تر سره شوې ده په ګوته کړې یې ده چې موبایل نن سبا د ملګرو تر منځ د اړیکو ټینګولو پر ځای د واټن پیداکېدو لامل شوی دی.
۴- ښه ملګری یو ښه اورېدونکی هم دی
ایا تر اوسه داسې شوي، چې ملګري ته مو د زړه راز کوئ، دوی ناڅاپي د خبرې په منځ کې در ټوپ کړي او د خپلو ستونزو په اړه یې درته یوه خبره کړې وي؟ په داسې حالاتو کې څه ډول احساس کوئ؟ ارو مرو به مو خبرې بې خونده شوې وي او هغه څه مو چې غوښتل ور سره شریک یې کړئ، نه یې شریکوئ. په ملګرتیا کې باید دوه اړخیز زغم موجود وي او پر موقع باید دواړوه خواې په پوره ارامۍ خبرې وکړي او نظرونه سره شریک کړي.
۵- ښه ملګری په بده ورځ در سره په څنګ کې وي
ښه ملګری هغه دی، چې هېڅ وخت مو یوازې پرنږدي. هغه کسان چې یوازې په خوښیو کې مو ګډون کوي، ښه ملګري نه دي. بلکې ښه ملګری هغه دی چې په خوښۍ او غم دواړو کې مو تر څنګ ودرېږي. ښه ملګری ډېر کله د کورنۍ د یوه غړي په څېر وي او داسې احساس درکوي، چې له ورور څخه هم درته نېږدې دی.
۶- ښه ملګری مو پر بدو پل در ږدي
موږ ډېره کله د اړیکو پر مهال ناسمې پرېکړې کوو. ښه ملګری د دې پر ځای چې کوم شی په زړه کې وساتي، مخامخ یې درته وایي، تر څو سوی تفاهم له منځه ولاړ شي. ښه ملګري یو بل درک کوي، همدا درک کول د دې لامل کېږي، چې یو بل ته بښنه وکړئ او په وړو مسایلو ترې خوابدي نه شئ.
