ژباړه: حمیدالله حمیدي
هغه ده چې له ۲۵ کلنۍ اوړئ، خو لا هم درته د ملګرو پیدا کول ستونزمن دي، یا دا چې څوک در سره ملګرۍ ته زړه نه ښه کوي. د ملګر پیدا کول هم څه اسانه خبره نه ده. د یوه داسې ملګري پیدا کول، چې تل مو په څنګ کې وي، په خوښۍ مو خوشاله او په درد مو دردمن وي دوه اړخیزو اړیکو ته اړتیا لري. ملګري په ژوند کې ډېر زیات اغېز لري. ښه ملګری مو روحیه لوړوي، په بده ورځ کې ډاډ درکوي، مانا دا چې ښه اورېدونکی وي او د زړه بړاس ورته ایستلی شئ. ښه دوست ډېرې نورې ښې ځانګړنې لري. که مو شاوخوا خالي وي او د ډاډګرنې لپاره لا هم ملګري در سره نه وي، نو لږ په خپل ګرېوان کې سر ښکته کړئ، ولې داسې یئ.
دلته د هغه دلایلو یادونه کوو، چې نه شی کولی د ځان لپاره ملګري پیدا کړئ.
۱- تل بدې ورځې کوئ
که تل له خپلې دندې، او بې پیسې توبه شکایت کوئ، پر نورو غوسه کېږئ او د ژوند له بې عدالتیو ځورېږئ، نو خلک هم اړ نه دي، چې ستاسو دې بې مورده خبرو ته غوږ کېږدي، خپل وخت ضایع او د خولې خوند بد کړي. ګیلې او ماني ډېر ژر د سړي زړه تنګوي او د خلکو نفرت در څخه کېږي. هڅه وکړئ، چې مثبت اوسئ. که غواړئ ملګري مو زیات شي، خپلې بریاوې او خوښي له نورو سره شریکې کړئ.
۲- ځان غوښتونکي یاست
دا هم باید په یاد ولرئ ځکه ملګري نه لری، چې ځان غوښتونکي یی. ملګرتیا کله کله له ځانه تېردل هم غواړي. خو که تل په دې هڅه کې وی، چې میم زبر ما، ټول زما! بیا نو د در سره د ملګرو د پاتې کېدو تمه مه کوئ.
۳- ملګرو ته مو پام نه کوئ
که دا درته مهمه نه وي، چې په ملګرو مو څه ترېږي، خوشاله دي او که خپه، نو د ملګرو زړه مو هم درڅخه سړېږي، هغه ده چې له تاسو سره ملګرۍ ته ادامه نه ورکوي. دا باید ومنئ، هغه څه مو چې د ملګرو په ژوند کې راځي درته مهم دي. هغه که خوښۍ وي او یا هم بدې ورځې. په دواړو حالتو کې باید د خپلو ملګرو تر څنګ وی. که خوښي وي، چې یو پر دوه شي او که خدای مه کړه غم وي چې وویشل شي.
۴- نیت بدي یاست
که غوائ، ملګري مو ډېر شي نو نیت بدي مه کوئ.که مو د ملګري په نوي موټر، په دنده کې د هغوی د ترفیع او یا د هغوی پر نورو بریاو باندې نیت بدوئ، نو له ستونزو سره مخ کېږئ. هڅه وکړئ، چې د ملګرو پر بریاو خوشاله شئ او جشن ورته ونیسئ. خو که نیت بدی وی، ارو مرو مو له رفتاره ښکاري ان که یې د پټولو هڅه هم وکړئ.
۵- معاملهګر یاست
ما کړي اوس یې باید ته وکړې! دا خبرې په ملګرۍ کې ځای نه لري. که مو په ملګرۍ کې دا ډول خبرو ته لمن ووهله، نو ملګري به مو له لاسه ورکړي وي. د دې خبرې مانا دا نه ده چې یوازې تاسو باید د ملګرو لپاره خرچه وکړئ. که ټول له ځان سره دغه ډول فکر ولري او په زړونو کې یې اخلاص او صداقت موجود وي، نو هغه ده چې ملګري به تل پاتې وي، خو که یو بل ته په زړونو کې غله وي، بیا تر ډېره دوام نه کوي.
۷- له ملګرو ډېره تمه لرئ
که تاسو غوائ، چې ملګري مو باید هره ګړۍ په خدمت کې وي او هرې غوښتنې ته مو ځواب و وایي، نو د ملګرو لرلو تمه مه کوئ، ځکه له یوه لاسه ټک نه خېږي. کېدای شي ډېر کله مو ملګري ناهیلي کړي، خو دا په دې مانا نه ده، چې هغوی ښه ملګري نه دي، له ټول باید د ځان په کچه تمه ونه لرو. هڅه وکړئ ویې بښئ.
یادونه: د اسلام د مبارک دین سپارښتنه ده وایي، بهترین د ستاسو هغه څوک دی، ورځ تر بلې یې د ملګرو شمېر ډرېږي او کمبخته بیا هغه دی، چې شته ملګري له لاسه ورکوي.
