ژباړه: ګلثوم محمدي
سالم پر ځان باور د ماشوم د ودې له مهمو بنسټونو څخه شمېرل کېږي او د ماشوم په چلند، رواني، ټولنيز او احساساتي روغتيا کې مهم رول لوبوي. ارواپوهان په دې باور دي، سالم په ځان باور د ماشومتوب په دوران کې جوړېږي؛ له همدې امله مور او پلار د ماشومانو د ځان درناوي په وده کې کليدي رول لوبوي. هغه ماشوم چې په ځان باور لري، کولای شي چې په خپل ژوند کې له ناکاميو، ټولنيز فشار او د ژوند د نورو ننگونو سره مبارزه وکړي او د خپل ژوند طلايي فرصتونه له لاسه نه ورکوي.
د دې ليکنې تر پايه موږ سره اوسئ، ترڅو په ماشومانو کې د ځان باور د لوړولو په اړه معلومات ترلاسه کړئ.
په ماشومانو کې د ځان لوړولو ارزښت
په ځان باور يا د ځان درناوی یعنې هغه وړتياوې چې شخص د هغې په لرلو سره خپلو موخو او غوښتنو ته رسېږي. که چېرې په ماشومانو کې د ځان باور پياوړی شي، دوی په سمه توگه خپل وړتياوې پېژني. په حقيقت کې هغه ماشوم چې پر ځان باور لري، خپل ځواک او وړتياو ته ارزښت ورکوي او خپلو لاسته راوړنو ته وياړي.
له بلې خوا، په ماشومانو کې په ځان باور لوړول د دې لامل کېږي، کله چې دوی د ننگونو سره مخ کېږي، د وېرې پر ځای ورسره مقابله کوي. هغه ماشومان چې داسې شخصيت لري، خپل وړتياو ته باور لري او تل هڅه کوي چې غوره شيان ترلاسه کړي. که په ماشومانو کې سالم په ځان باور وده ورکړل شي، که دوی په خپل کارونو کې کاميابه هم ونشي، نه يوازې چې خپل هیلې له لاسه نه ورکوي، بلکې بيا هم هڅه کوي ترڅو خپلو موخو ته ورسېږي.
په ماشومانو کې پر ځان باور د لوړولو لپاره غورې لارې چارې
ارواپوهان په دې باور دي، چې په ځان باور په ماشومانو کې له څلور کلنۍ څخه تر يوولس کلنۍ پورې جوړېږي. مور او پلار کولای شي، د ځينو غورو لارو چارو په کار کې نيولو سره د ماشومانو په ځان باور لوړې کړي.
له خپل ماشوم سره لوبې وکړئ
کله چې تاسو خپل ماشوم سره لوبې کوئ او ورته وخت پرېږدئ په حقيقت کې هغې ته دا ښيئ چې تاسو ته مهم دي. هغه مور او پلار چې خپل ماشوم سره لوبې کوي د دوی عاطفې اړيکې پياوړې دي. او دا د ماشوم د ځان باور په وده کې اغېزه لري.
له خپل ماشوم سره پرته له کوم قيد او شرط مينه وکړئ
ستاسو ماشوم بايد ډاډه وي، چې ستاسو مينه، محبت او لېوالتيا پرته له کوم قید او شرط دي. په حقيقت کې، له ماشوم سره ستاسو چلند بايد داسې وي، چې هغه پوه شي چې تاسو په هر حالت کې (حتا کله چې هغه دروغ وايي) هغې سره مينه لري او ورته پاملرنه کوئ.
خپل ماشوم ته غوږ ونیسئ
تاسو کولای شئ چې په راحتۍ سره د خپل ماشوم د خبرو په اوريدو سره د دوی باور زياته کړئ. په حقيقت کې، تاسو ماشوم ته دا ښيئ چې تاسو ته څومره مهم دي.
خپل ماشوم وهڅوئ
ځينې مور او پلار عادت لري چې د خپل ماشوم په ضعف باندې ډېر کار کوي. تاسو بايد پوه شئ چې دغه تربيتي لاره يا ميتود د ماشومانو په ځان باور منفي اغېزه کوي. په حقيقت کې، که تاسو خپل ماشوم په ښه کارونو ونه هڅوئ. دوی په ځان باور نه کوي او په خپل کارونو بريالۍ نه کېږي.
خپل ماشوم ته سپکاوی مه کوئ
مور او پلار هېڅ کله هم بايد منفي جملې ونه کاروي لکه( ته بي نظم يې)،( ته تنبل يې)،( ته ډارن يې) او داسې نور…
ماشوم په دوامداره توگه د دې جملو په اوریدلو سره په ځان باور يې کمېږي او په ځوانې کې ورباندې اغېزه کوي.
خپل ماشوم ته مثبت فکر ور زده کړئ
د خپل ماشوم د ځان باور د لوړولو لپاره هغوي ته دا زده کړي چې له ستونزو، ننگونو او ناکاميو سره مخ شي. که ستاسو ليد نړۍ ته مهربانه وي؛ نو ستاسو ماشوم په نړۍ کې د مثبت ليد په لرلو سره، وده کوي او هېڅ کله هم له هڅه کولو څخه لاس نه اخلي.
