ژباړه: ګلثوم محمدي
مستې Yogurt)) يو ساده غذايي مواد، خو خورا مغذي خواړه دي، چې په غذايي رژیم کې له اصلي اجزاوو څخه شمېرل کېږي. دا لبني محصول د بدن د ايمني سیستم د پياوړتيا، د هاضمي سیستم د فعاليت ښه کول او همدارنگه د هډوکو په جوړولو کې مرسته کوي او د ځينو ناروغيو د اخته کېدو خطر کموي.
په دې روغتيايي ليکنه کې، د مستو گټې درپېژنو او دا به وايو چې ولې یې بايد په خپل غذايي رژیم کې شامل کړئ. تر پايه موږ سره پاتې شئ.
د مستو گټې
ځينې لبني محصولات په خپل ترکيب کې پروبیوتیک لري. پروبیوتیک له سالمو باکترياوو څخه شمېرل کېږي، چې د کولمو په روغتيا کې مهم رول لوبوي. د هاضمې سيستم فعاليت تنظيموي او همدارنگه د قبضیت، نس ناستي او د معدې نفخ د اخته کېدو خطر کموي.
څېړنې ښيي چې پروبیوتیک لرونکي مستې د بدن د ايمني سیستم د پياوړتيا لامل کېږي او د وزن د مديريت کولو لپاره هم مناسبې دي. مستې د سرطانونو د اخته کېدو خطر کموي او همدارنگه د ويټامينونو او معدني موادو په جذبولو کې مرسته کوي.
څېړنو ښودلې چې پروبیوتیک د بدن د سټرس په کنټرول کې مرسته او د اضطراب او خپگان د اخته کېدو خطر کموي.
مستي د پروټين او نورو مغذي موادو بډايه سرچينه
پروټين د مغذي موادو يوه غوره سرچينه ده، چې د ايمني سیستم د ښه فعاليت او د نسجونو د ودې لپاره بدن ورته اړتيا لري. دا لبني محصول په زياته کچه په خپل ترکيب کې سلينيم، ويټامين B12 او زينک لري، چې له بدن څخه ساتنه کوي. همدارنگه په مستو کې د پروټين، کلسیم، مگنيزيم او فاسفورس شتون د هډوکو او غاښونو د پياوړتيا او د هډوکو له ورستېدلو څخه مخنيوی کوي. سربېره پر دې، مستې د عضلاتو د ودې لامل کېږي. دغه مغذي مواد د ډېرو پروټين په لرلو سره د موړتيا (سیري) احساس زياتوي او د وزن په کمولو کې مرسته کوي.
د امېندوارو مېرمنو ته د مستو گټې
مستې د امېندوارو ښځو لپاره گټور او مغذي خواړه دي. ځکه دا مغذي مواد د جنين د ودې او د مور د هډوکو د روغتيا لامل کېږي. د ايمني سیستم د فعاليت ښه کولو او مور ته د اړتيا ور پروټين يوه مهمه برخه چمتو کوي. سربېره پر دې، دغه مغذي مواد په خپل ترکيب کې په زياته کچه ويټامينB12 لري، چې د وينې د سرو حجرو په توليد او د عصبي سیستم د ښې فعاليت او روغتيا لامل کېږي.
ماشومانو ته د مستو گټې
له شپږو مياشتو څخه پورته د ماشومانو لپاره د مستو گټې عبارت دي له: د هډوکو او غاښونو پياوړتيا، د هاضمي سیستم د حرکتونو تنظيم او عضلاتو او نسجونو ودې. د کارپوهانو په وينا د دوه کلونو څخه کم عمر لرونکي ماشومان بايد د لوړ غوړ لرونکي لبنياتو څخه گټه واخلي، ځکه چې لوړ غوړ لرونکي مستي په ماشومانو کې د انرژي د ډېروالی لامل کېږي.
