د ترانسپورت او هوایي چلند وزارت د هواپېژاندې ادارې نن (یکشنبې) د هېواد په ۲۵ ولایتونو کې د واورې، باران او لنډمهاله چټکو بادونو اټکل کړی دی.
دې ادارې پرون (شنبې، د دلوې ۲۰مه) په خبرپاڼه کې ویلي چې دا اټکل د سالنګونو په ګډون په هرات، فراه، نیمروز، هلمند، کندهار، زابل، ارزگان، دایکندي، غور، بادغیس، فاریاب، سرپل، بامیان، وردګ، کابل، لوگر، پکتیا، خوست، پکتیکا، غزني، جوزجان، بلخ، پروان، بغلان او پنجشیر ولایتونو کې شوی دی.
د خبرپاڼې له مخې چې د باران اندازه به په بېلابېلو سیمو کې له ۱۵ تر ۳۵ ملي مترو او د واورې اندازه تر ۴۰ سانتي مترو پورې اټکل شوې ده.
د هواپېژندنې ادارې په خبرپاڼه کې دا هم ویل شوي چې د ورښت ترڅنګ په شمېر ولایتونو کې د لنډمهاله چټکو بادونو د را الوتو اټکل هم شته چې سرعت به یې په بېلابېلو سیمو کې په یو ساعت کې تر ۷۰ کیلیو مترو پورې وي.
دا په داسې حال کې ده چې سږنی ژمی د هېواد په ډېرو سیمو کې درانه واورین ورښتونه وشول، چې هېوادوالو د یو اباد کال نښه بللې، خو په ځینو سیمو کې یې خلکو ته ځاني او مالي زیانونه هم اړولي دي.
