ژباړه: حامد بهیر
پلاټ یا طرحه د کیسې چوکاټ دی چې دعلت او معلول په اړیکه باندې تکیه کوي.
په طرحه کې د کیسې اساسي خطونه په ترتیب او فشرده ډول باندې د منطق په اساس روایت کېږي. د کیسې په طرحه کې ددې پوښتنې اجمال ته ځواب ورکول کېږي: « کیسه د څه په اړه وه؟».
طرحه یا پلاټ د کیسې هډوکي او اسکیلیټ دی په تعلیلي ( علت او معلول ) ډول باندې.
طرحه او د پېښو لېږد په کیسه کې د سببیت په اساس وي، طرحې ته د کیسې نقشه هم وایي.
طرحه یا پلاټ د کیسې له لنډیز سره توپیر لري؛ په لنډیز کې د کیسې موخه او د کیسې په اړه لنډې خبرې وي، په داسې حال کې چې طرحه د کیسې روایت، اسکیلیټ او نقشه ده، د علت او معلول د اړیکو په ټینګار باندې.
په بله وینا؛ کیسه د طرحي انبساط شوی او پراخه شکل دی چې لیکوال یې د کیسې د تخلیق نه مخکې په ذهن یا د کاغذ پر مخ باندې لیکلی وي.
د طرحې لیکلو پر وخت کله غوښتنه دا وي چې دا څلور اصله تر پښو لاندې نه شي او پام ورته وشي.
۱. د طرحې وخت دې د حال په ډول و ټاکل شي.
۲. طرحه دې د درېیم شخص په ډول باندې نقل شي.
۳. پېښې د وخت په تسلسل باندې برابرې وي.
۴. جزیات په کې ونه لیکل شي.
طرحه معمولا په ۲۰۰ یا ۳۰۰ کلمو کې ډېر په لنډ ډول باندې لیکل کېږي، چې د کیسې اصلي نقشه او اساسي نکتې په کې شتون ولري.
پورته مالوماتو ته په کتو، اوس تاسې کولای شئ چې د یوې لنډې کیسې یا ډرامې طرحه د ۳۰۰ کلمو په یو پراګراف کې ولیکئ؟
که کولی شئ نو همدا اوس قلم را واخلئ او د یوې لنډې کیسې د طرحې یا پلاټ په لیکلو باندې پيل وکړئ.
