محمدنظیم سمون
د څېړنو پربنسټ په افغانستان کې په شاوخوا ۳۱ زره کیلو متره مربع ساحه کې د ۶۷ زره مېګاواټه بادي برېښنا د تولید ظرفیت موجود دی. هرات، فراه او نیمروز هغه ولایتونه چې د بادي برېښنا د تولید لپاره فوق العاده پوتنشیل لري.
نن د افغانستان برېښنا شرکت او د 77 په نامه ترکي کمپنۍ ترمنځ په هرات کې د ۲۰۰ مېګاواټه بادي برېښنا د لومړي لاټ (۴۰ مېګاواټه) بادي برېښنا د تولید پروژې تړون لاسلیک شو.
دا پروژه د هرات په دشت حوض کې موقعیت لري. دشت حوض د هرات ښار ته نږدې هغه هواره دښته ده چې کال دولس میاشتې شمال لري.
د دشت حوض په اړه یو وخت ایرانیانو افغانستان ته وړاندیز کړی و چې غواړي دلته د بادي برېښنا د تولید په برخه کې پانګونه وکړي خو شرط یې دا و چې د افغانستان د اړتیا وړ ټوله برېښنا به ورته تامینوي او پاتې به یې ایران ته لېږدوي. مانا دا چې دا ساحه د لسګونه زره مېګاواټه برېښنا د تولید ظرفیت لري.
دا د خصوصي پانګونې لپاره ډېره مساعده سیمه ده. سربېره پر دې چې د بادي برېښنا لوړ پوتنشیل لري، له اقتصادي پلوه هم د پانګونې لپاره په زړه پورې ده؛ ځکه چې یاده سیمه د اسلام کلا او تورغونډۍ لویو لارو او بندرونو ته نږدې پرته ده چې هم د ایران چابهار او بندر عباس او هم د ترکمنستان ترکمن باشي اوبیزو بندرونو له لارې د اوسپنې پټلۍ په مرسته د توربینونو او تجهیزات راوړل ورته ډېر اسانه او اقتصادي تمامېدای شي.
