سمون خپرندویې ټولنې په کابل کې د لیک او لوست د زدهکړې لپاره په پښتو او دری ژبو اته کتابونه چاپ کړي دي.
د پوهنتون استاد، ګل رحمن رحماني د دغو کتابونو په اړه لیکلي: “د لیک لوست زده کړې لپاره هر څوک ښوونځي او ټولګي ته د تګ امکانات نه لري، دا ستونزه د عمر او بوختیاوو په لوړېدو سره لا زیاته شي. سمون خپرندویه ټولنې دا ځل د چټکو زده کړو او ښوونیزو مرکزونو کې د لیک او لوست د زده کړې لپاره د څلورو کتابونو یو جلا نصاب په اتو کتابونو کې په پښتو او دري ژبو ترتیب کړی او چاپ شوي دي. دا نوښت دې سمون صاحب او د دې کتابونو کاري ټیم ته مبارک وي.”
د دغو کتابونو لیکوال، محمدمصطفی سمون د دې کتابونو د محتوا په اړه وايي:
“په لومړي کتاب کې د الفبا توري، د الفبا تلفظ او لیکل شوې بڼه، د ټکو لرونکو او بې تورو جلا جلا په چوکاټ کې ښودل او بیا د هر توري لپاره درې کلیمې د بېلګې په ډول را وړل شوې دي. مثلا د الف توری په سر، منځ او اخر کې کارول بیا د هغه تمرین.
په دویم کتاب کې د هرې توري لپاره درې یا څلور جملې جوړې شوې دي، پسې د لغتونو مانا، په یوه چوکاټ کې له تورو کلیمې جوړې کړئ او په بل چوکاټ کې د کلیمو توري جلا جلا ولیکئ.
په اخر کې پورتنی لوست په خپلو کتابچو کې شپږ ځله ولیکئ.
درېیم کتاب کې پند لرونکې وړې وړې کیسې را وړل شوې دي، استاد ستاسو له زرو هیندارو کور او ځینې یې ما وخت نا وخت وړې وړې ژباړې کړې وې هغه مې پکې راوړې دي او په ځینو ځایونو کې ځیني نور موضوعات، لکه د الف په توري کې د افغانستان د ولایتونو او مرکزونو نومونه راوړل، د رنګونو پېژندل، لبنیات او داسې نور موضوعات دي. بیا لغتونه، له تورو کلیمې جوړې کړئ په چوکاټ کې راوړل شوې دي او بیا خانه خالي تمرین راوړل شوی دی.
په څلورم کتاب کې د افغانستان تاریخي نومونه، د افغانستان کرنیز محصولات، کانونه، د کابل تاریخي ځایونه او تفریحي ځایونه، د افغانستان د اوبو حوزې او بندونه،د بامیانو تاریخي اثار، نورستان ملي پارک، څلور تاریخ لیکونکي فیض محمد کاتب، عبدالحی حبیبي، احمد علي کهزاد، پوهاند حسن کاکړ.
همداراز د افغانستان تاریخي اشخاص میرویس نیکه، احمد شاه بابا، نازو انا، غازي امان الله خان، ابن سینا، سید جمال الدین افغان، عبدالغفار خان، خوشحال خان او رحمن بابا دا موضوعات پکې راغلي دي.
په دري کې بیا د پارسي ژبو شاعرانو یادونه پکې راغلې ده او نور موضوعات بیا همدې ته ورته دي.”
