د افغانستان کرېکټبورډ وايي، ملي لوبډله په راروانه سپټمبر میاشت کې له سوېلي افریقا سره درې یو ورځنۍ لوبې لري.
کرېکټ بورډ نن (چهارشنبه، د زمري ۱۰مه) په یوه خبرپاڼه کې ویلي، ملي لوبډله په سپتمبر میاشت کې د نیوزیلنډ پر وړاندې د ټېسټ له یوازېنۍ لوبې وروسته د دریو نړیوالو یو ورځنیو سیالیو د لوبلړۍ په موخه د سویلي افریقا لوبډلې کوربهتوب کوي چې لومړۍ لوبه به یې د همدې میاشتې په ۱۸مه نېټه پیل او لوبلړۍ به یې د سپتمبر تر ۲۲مې نېټې پورې دوام ومومي.
کرېکټ بورډ ویلي، ټاکل شوې دغه لوبې د سپټمبر میاشتې په ۱۸مه، ۲۰مه او ۲۲مه په متحده عربي اماراتو کې د افغانستان په کوربهتوب ترسره شي
د سویلي افریقا سره د افغانستان کريکټ ملي لوبډلې د لوبو په اړه د کرېکټبورډ مشر میرویس اشرف ویلي، چې دا لومړی ځل دی چې افغانستان له سوېلي افریقا سره لوبلړۍ لري او کوربهتوب یې هم افغانستان کويی.
هغه زیاته کړه، ” دا ډېر د خوښۍ ځای دی چې د لومړني ځل لپاره د سویلي افریقا لوبډلې پر وړاندې دوه اړخیزه لوبلړۍ ترسره کوو او کوربه توب یې هم د افغانستان کرکټ بورډ پر غاړه دی. له شک پرته سویلي افریقا د کرکټ په نړۍ کې یو ستر نوم دی او له اتلانو سره د دوی سیالۍ به له ولولو او خوندونو ډکې وي.”
په خبرپاڼه کې راغلي چې ډېر ژر به د نیوزیلنډ پر وړاندې د یوازېنۍ ټېسټ لوبې او سویلي افریقا لوبډلې پر وړاندې د دغې لوبلړۍ په موخه لوبډلې هم اعلان شي.
کرېکټ بورډ ویلي، د سویلي افریقا پر وړاندې له لوبلړۍ وروسته به په ډېر احتمال سره د بنګله دېش پر وړاندې د بشپړې لوبلړۍ لړۍ هم پیل شي چې له یاد بورډ سره د نېټو له نهایي کولو وروسته به یاده لوبلړۍ هم ډېر ژر اعلان شي.
