پروان/ ۱۴۰۴، د وږې ۳۰مه
د ارغوان ادبي بهیر د پر له پسې ناستو په لړ کې ددې بهیر اتمه ناسته «پر ټولنیز ژوند د داستاني ادبیاتو اغېزې» په نوم لکچر او مشاعرې ته ځانګړې شوې وه، چې په کې د پروان پوهنتون د پښتو ژبې او ادب څانګې لسګونو محصلانو او استادانو ګډون کړی و.
غونډه غرمه مهال یوولس بجې د پښتو څانګې د ناستو تالار کې د قرانکریم د مبارکو ایتونو په تلاوت سره پیل شوه او ورپسې جوخت نعمت الله صداقت د تېرې ناستې راپور وړاندې کړ. له وعدې سره سم د لکچر برخه را ورسېده چې دا ځل یې مېلمه لیکوال او ادیب، د پښتو ادبیاتو ماسټر عبدالرشید سعادت و.
نوموړي پر ټولنیز ژوند د داستاني ادبیاتو اغېز تر عنوان لاندې خپل لکچر وړاندې کړ او وویل چې ادبیات او ټولنپوهنه یو له بل سره نه شلېدونکې اړیکې لري او کوم داستان لیکوال چې د ټولنپوهنې مطالعه او پوهه لري، ښه داستانونه هم پنځولی شي.
هغه زیاته کړه چې زموږ د ژوند ډېرې هیلې او خوبونه د داستاني کرکټرونو د تمثیل په مرسته پوره کېږي او هغه وګړي چې زیات داستانونه لولي، د ذهني حجرو د ژوندي کېدو او ذهانت سبب ګرځي او د با مسوولیته ژوند تېرولو لپاره چمتو کېږي. سعادت د لکچر په پای کې اړوندو پوښتنو ته ځوابونه ورکړل او ورپسې د مشاعرې برخه پیل شوه چې ګڼو محصلانو په کې خپل شعرونه وړاندې کړل.
د مشاعرې د ارزونې لپاره د پښتو څانګې مشر استاد پوهنمل نصرت الله نصرت را غوښتل شو، غونډه یې مثبت ارزیابي کړه او وویل چې ښاغلي سعادت یوه ښه موضوع وړاندې کړه او کیسه لیکوال باید د ادبپوهنې د اصولو تر څنګ د ټولنپوهنې په برخه کې هم پراخه لید او پوهه ولري، څو داستانونه یې مثبت اغېز او ټولنیز جذب پیدا کړي.
هغه زیاته کړه چې له دې وروسته به د بهیر په غونډو کې د شعر کره کتنې او نثرونو ته هم ځای ورکړي. ناسته د غرمې په دولس نیمو بجو پای ته ورسېده.
د یادونې وړ ده چې ارغوان ادبي بهیر د پروان پوهنتون د ادبیاتو پوهنځي په پښتو څانګه پورې تړاو لري چې پخوا یې د ګلغونډۍ په نامه فعالیت درلود. د نوموړي بهیر ناستې په هرو لسو ورځو کې د څانګې د یوه ټولګي په مدیریت جوړېږي چې له دې پوهنځي پرته د نورو پوهنځیو محصلان، استادان او د ادب مینه وال هم په کې ګډون کوي.
پای
