عن أبی هریره رضی الله عنه قال: سمعت رسول الله صلى الله علیه وسلم یقول: والله إنی لأستغفر الله وأتوب إلیه فی الیوم أکثر من سبعین مرة. [رواه البخاري]
ژباړه: له ابو هریرة رضي الله عنه څخه روایت دی، هغه ویلي: “له رسول الله ص څخه مې اورېدلي چې ویل یې، قسم په الله چې زه په ورځ کې له اویا ځلې ډېره له الله تعالی څخه بښنه غواړم او توبه وباسم.”
عن الأغر بن يسار المزني رضي الله عنه قال: قال رسول الله ص: يا أيُّهَا النَّاسُ، تُوبُوا إلى اللهِ واسْتَغْفِرُوهُ، فَإنِّي أَتُوبُ في اليَّومِ مائةَ مَرَّةٍ. [رواه مسلم]
ژباړه: له الاغر بن یسار المزنی رض څخه روایت دی، هغه ویلي: “رسول الله ص فرمایلي، اې خلکو الله تعالی ته له ګناه کولو توبه وباسئ او بښنه ترې وغواړئ، زه په ورځ کې هرو مرو سل ځلې توبه کوم.
توبه په لغت کې ګرځېدو ته وایي او په شریعت کې د ګناه له امله د الله تعالی له لرې والي څخه د هغه لور ته ګرځېدل دي.
د حدیث فواید:
۱ – له الله تعالی څخه بښنه غوښتل او له تېرو ګناهونو څخه توبه کول واجب دي. ۲ – له الله تعالی څخه بښنه غوښتل او توبه کول د ګناه بښنې ترڅنګ د درجو د لوړوالي لامل ګرځي. ۳ – رسول الله ص په داسې حال کې چې د هغه ټول ګناهونه بښل شوي د ورځې سلې ځلې بښنه غوښتې او توبه یې ایستلې ده. ۴ – په حدیث شریف کې یادونه شوې چې رسول الله ص په ورځ کې اویا ځلې له الله تعالی بښنه غوښته او توبه یې وایستله. له دې څخه مقصود دغه عدد پوره کول نه دي، بلکې د هغه موخه ډېره توبه ایستل او ډېره بښنه غوښتل دي.
